Türkiyə Futbol Federasiyası ölkə kubokunun və superkubokunun formatını dəyişmək qərarına gəlib. Qurum “Hypercube” şirkəti ilə işbirliyi əsasında bu addımı atıb.

Qeyd edək ki, Çempionlar Liqasında gələn mövsümdən qüvvəyə minəcək yeni formatı da məhz bu şirkət hazırlayıb.

Beləliklə, yenilik onan ibarətdi ki, Türkiyə kubokunda qrup mərhələsi qüvvəyə minəcək. 24 komanda hərəsində 6 iştirakçı olmaqla 4 qrupa bölünəcək. ÇL-də olduğu kimi, burda da İsveçrə sistemi tətbiq olunacaq. Yəni komandalar bir-biri ilə bir dəfə qarşılaşacaq. Hər komanda qrupda 5 oyun keçirəcək. Qrupu ilk iki pillədə tamamlayanlar növbəti mərhələyə, yəni 1/4 finala vəsiqə qazanacaqlar. Gələn mövsüm Türkiyəni avrokuboklarda təmsil edəcək kollektivlər mübarizəyə birbaşa qrup mərhələsindən başlayacaqlar. 19 kollektiv isə təsnifat mərhələlərindən sonra bəlli olacaq. Həm 1/4 final, həm də yarımfinalda qalib bir oyunla bəlli olacaq.

Superkuboka gəlincə, bilindiyi kimi, bu titul uğrunda ölkə çempionu ilə ölkə kubokunun qalibi qarşılaşırdı. Bu il bu sistem davam edəcək. Yəni “Qalatasaray”la “Beşiktaş”ın avqustda keçirilməli olan oyunu qüvvədə qalacaq. Amma gələn ildən etibarən superkubok 4 komandanın iştirakı ilə kiçik bir turnirə çevriləcək. Burda superliqa çempionu, superliqanın ikincisi, ölkə kubokunun qalibi və kubokun finalçısı iştirak edəcək. Qaliblər finalda qarşılaşacaq. İspaniya superkuboku son illərdə məhz bu formatda keçirilir.

Bundan başqa, TFF kubok və superkubokun yayın sponsoru “Turkuvaz” Media Qrupu ilə müqavilənin birilliyə yeniləndiyini açıqlayıb. TFF-nin rəsmi açıqlamasında gəlirlərin üçqat artacağı qeyd olunub. Yəni kubok və superkubokda iştirak edənlər əvvəlki illə müqayisədə yayın gəlirlərindən üçqat artıq qazanacaq. “Fənərbaxça”nın qarşıdakı mövsümdə ölkə kubokunda iştirak etməyəcəyini də xatırladaq.