Türkiyədə futbol mövsümünün başa çatmasına çempionatda 6 tur, ölkə kubokunda cəmi 1 oyun qalmasına baxmayaraq, superkubokda hansı klubların qarşılaşacağı və bu turnirin hansı formatla oynanılacağı hələ də bəlli deyil.

"Football-plus.az" xəbər verir ki, bu mövsümə qədər superkubok uğrunda oyunda, adətən, ölkə çempionu ilə ölkə kubokunun qalibi qarşılaşırdı. Hər iki turnirdə eyni qalib olduqda kubokun finalçısı superkubokda oynamaq haqqı qazanırdı. Amma Türkiyə Futbol Federasiyasının əvvəlki rəhbərliyi superkubokda formatın dəyişəcəyini və bu turnirin 4 klubun iştirakı ilə keçiriləcəyini açıqlamışdı. Bu qərar ötən il iyunun 13-də Mehmet Büyükekşinin başqanlığı dönəmində rəsmən ictimaiyyətə açıqlanmışdı. Orda qeyd olunmuşdu ki, 2023/24-ün superkuboku əvvəlki formatla keçirilən son turnir olacaq. 2024/25-dən etibarən format dəyişəcək və superkubok uğrunda ölkə çempionu, 2-ci yerin sahibi, ölkə kubokunun qalibi və kubokun finalçısı olmaqla 4 komanda mübarizə aparacaq.

Maraqlıdı ki, bu açıqlamadan bir ay sonra, daha dəqiqi, iyulun 18-də federasiyada növbədənkənar seçki keçirildi və İbrahim Hacıosmanoğlu yeni başqan seçildi. Onun prezident seçilməsinin üzərindən artıq 9 aydan çox vaxt keçib. Amma hələ də dəyişikliklə bağlı hansısa xəbər yoxdu. Mövsümün əvvəlində, adətən, TFF tərəfindən hər turnirin formatı ayrı-ayrılıqda açıqlanır. Bu mövsümkü superkubok da əvvəlki formatla göstərilmişdi. Yəni bu gün etibarilə vəziyyət belədi ki, “Qalatasaray” hər iki turnirin qalibi olsa, “Trabzonspor” superkubokda da oynayacaq. Yəni “Qalatasaray”la “Trabzonspor”un duelini həm kubokun finalında, həm də superkubokda izləyəcəyik.

Bəs TFF əvvəlki rəhbərliyin qərarını həyata keçirəcəyi və yeni format qüvvəyə minəcəyi təqdirdə vəziyyət necə olacaq? Belə olacağı halda artıq üç klubun superkubokda iştirakı dəqiqdi. Çünki superliqanı ilk iki pillədə tamamlayan klublar bəllidi. Söhbət “Qalatasaray”la “Fənərbaxça”dan gedir. “Trabzonspor” isə kubokun finalçısı kimi superkuboka qatılacaq. “Qalatasaray”ın həm çempionatda ilk “2-lik”də qərarlaşması, həm də kubokda iki finalçıdan biri olması üzündən superkubokun digər iştirakçısı isə Türkiyə çempionatında mövsümü 3-cü pillədə bitirən komanda olacaq. Superkubokda yarımfinaldakı mümkün cütlər də, demək olar, bəllidi. Yeni formata görə yarımfinalda superliqanın çempionu kubokun finalında məğlub olan komanda ilə, superliqanın ikincisi isə kuboku qazanan komanda ilə qarşılaşacaq.

Yəni “Qalatasaray” superliqanı qazansa, kubokun finalının nəticəsindən asılı olmayaraq, yarımfinalda “Fənərbaxça” “Trabzonspor”la qarşılaşacaq. Digər cütdə isə “Qalatasaray” mövsümü 3-cü yerdə bitirən kollektivlə üz-üzə gələcək.