Sərgən Yalçın ''Qalatasaray''ı nəyə görə tənqid etdi?
Son olaraq ötən mövsümün ikinci dövrəsində ''Antalyaspor''u çalışdıran və hələ də işsiz olan Sərgən Yalçın futbol eksperti qismində oyunları, komandaları şərh etməkdə davam edir.
"Football-plus.az" xəbər verir ki, onun bu yay yenidən məşqçi karyerasını bərpa etdirəcəyi gözlənilir. Artıq dünyasını dəyişən qardaşının xəstəliyi ilə bağlı bu mövsümün gedişində iki dəfə ''Beşiktaş''ın təklifini geri çevirən Yalçına indidən ''Çaykur Rizəspor'' ciddi maraq göstərir.
Bu arada təcrübəli mütəxəssis ''Kafa Sports'' adlı ''yutub'' kanalında çempionluqdan bir xal uzaqda olan ''Qalatasaray'' üçün mövsümü dəyərləndirib. Yalçın Avropadakı uğursuzluğa görə İstanbul nəhəngini tənqid edib:
''Qalatasaray'' bu mövsüm Avropa arenasında çıx ciddi yaralar aldı. Komanda birmənalı şəkildə avrokuboklarda uğursuz çıxış etdi. Hətta bunu ''fiasko'' da adlandırmaq olar. Özü də səviyyə baxımından özündən daha zəif heyətə malik olan rəqiblərə uduzdu. ''Barselona'', ''Çelsi'', ''Tottenhem'', ''Liverpul'' kimi rəqiblərə uduzmağı qəbul etmək olar. Ancaq onların avrokuboklardakı rəqibləri səviyyəcə daha zəif klublar idi. Hətta heyətinin dəyəri baxımından özündən iki dəfə zəif olan klublara uduzdular. Yəni bu mövsüm əsas uğursuzluğu Avropada yaşadılar. Önümüzdəkı mövsüm nələr olacağını, heyətin planlaşdırılmasının necə həyata keçiriləcəyini bilmirəm. Bunları gördükdən sonra nəsə demək mümkün olacaq. Amma Türkiyə daxilində çox uğurlu mövsüm keçirdilər. Layiqli şəkildə bu nəticələri qazandılar''.
