Mayın 8-də keçirilən oyunlarla Konfrans Liqasında (KL) finaldan əvvəlki mərhələ sona çatdı.

Yarımfinalın ilk matçlarında qələbə qazanan hər iki komanda finala adladı.

yarımfinal, cavab oyunları
Çelsi (İngiltərə) - Yurqorden (İsveç) 1:0 (ilk oyun - 4:1)
Dyusberi-Holl, 38.
Çelsi: Yorgensen, Kukurelya (Meyka, 46), Badyaşil, Adarabioyo, Qüsto, Açimponq, Ceyms (Çaloba, 70), Uolş, Dyusberi-Holl, Sanço (Antvi, 70), Corc.
Yurqorden: Rinne, Kosuqi, Tenho, Une Larsson (Danielson, 63), Berq, Finndell (Selfven, 86), Svensson (Vuçenoviç-Persson, 81), Qulliksen (Atli, 86), Haarala (Alemayehu, 63), Priiske, Nquen.

Qitə kuboklarında ilk dəfə yarımfinalda oynayan “Yurqorden”in aqibəti böyük ölçüdə ilk matçdaca həll edilmişdi: öz meydanında KL-in əsas favoritinə 1:4 hesabıyla uduzan İsveç klubunu finala yalnız möcüzə çıxara bilərdi. Amma Londonda möcüzə baş vermədi. Baxmayaraq ki, səfərdə inamlı qələbə qazanan “Çelsi” evdəki cavab oyununa qeyri-optimal heyətlə çxdı. Entso Mareskanın komandası hər necə olsa, Dyusberi-Hollun ilk hissədə vurduğu yeganə qolla“Yurqorden”i yenə məğlub etdi.

Fiorentina (İtaliya) - Betis (İspaniya) 2:2, əlavə vaxtda (1:2)
Qosens, 34; 42 - Antoni, 30. Ezzalzuli, 97.
Fiorentina: De Xea, Komutso, Ranyeri, Ponqraçiç (Zanyolo, 106), Dodo (Kolpani, 106), Qosens (Parizi, 95), Mandraqora, Adli (Riçardson, 46), Facoli (Folorunşo, 88), Qudmundsson (Beltran, 95), Ken.
Betis: Vieytes, Sabali (Belyerin, 87/Pablo Qarsiya, 114), Natan, Bartra (Mendi, 58), Rodriges, Kardoso, Lo Çelso (Ezzalzuli, 58), İsko, Antoni, Fornals (Altimira, 91), Bakambyu (Ruibal, 91).

Yarımfinalın ən çox maraq doğuran duelində “Betis” öz meydanında “Fiorentina”ya 2:1 hesabıyla qalib gəlmişdi. İspaniya klubu İtaliyadakı cavab oyununun 30-cu dəqiqəsində Antoninin qolu ilə hesabı açsa da, çox keçmədən Qosensin qolları ilə fasilyə məğlub yollandı. İkinci hissədə komandalar əsasən ehtiyatlı oyuna üstünlük verdiyindən mübarizə 30 dəqiqəlik əlavə vaxta qədər uzandı. 97-ci dəqiqədə Ezzalzuli Antoninin ötürməsi ilə hesabı bərabərləşdirdi.

Qalan vaxtda rəqibindən daha yaxşı oynayan “Betis” tarixində ilk dəfə avrokubokun finalına vəsiqə qazandı. KL-in son iki mövsümünün finalçısının ardıcıl 3-cü finala çıxmaq istəyi isə baş tutmadı. Turnirin həlledici oyunu mayın 28-də Polşanın Vrotslav şəhərində keçiriləcək.

Bombardirlər: Pyulyulyu (Yagelloniya) - 8, Bakambyu (Betis) - 7, Qiyu (Çelsi), Kuçis (Selye) - 6.