“Fənərbaxça” camiəsinin seçkiyə hazırlaşdığını xəbər vermişdik.

Mayın 23-ü namizədliyin irəli sürülməsi üçün son tarix idi. Beləliklə, gözlənildiyi kimi, Əli Koçla Əziz Yıldırımdan başqa namizədliyini irəli sürən olmadı. Mayın 23-də hər iki namizədin idarə heyətində yer alan isimlər bəlli oldu. Koç həmin gün mətbuat konfransı keçirərək həm diqqətçəkən açıqlamalar verdi, həm də idarə heyətini açıqladı. Yeni idarə heyətində yeni isimlərdən ən çox diqqəti çəkəni, sözsüz, Acun Ilıcalıdı. Zatən srağagünkü mətbuat konfransına Koç Ilıcalı ilə birlikdə gəlmişdi. Məşhur şoumendən başqa idarə heyətində yeni isimlərdən Alpər Alpoğlu, Cenk Özatanık, Ərən Dişli, Ərgün Özən, Hakan Safi, Hamdi Akın, Hulusi Belgü, Hüseyn Bozkurt, Nedim Keçeli və Rıfat Perahyanı qeyd etmək olar.

Ərən Dişli daha öncə Əziz Yıldırımın rəhbərliyində yer almış Davud Dişlinin oğludu. O, bir müddət öncə tanınmış türkiyəli voleybolçu Zəhra Günəşlə eşq macərası yaşaması ilə diqqət mərkəzinə düşmüşdü. Əvvəlki idarə heyətində yer alan tanınmış simalardan Səlahəttin Baki, İlkər Dinçay, Ömər Okan və Can Gebetaş yeni rəhbərlikdə təmsil olunmayacaq. Əziz Yıldırımın açıqladağı idarə heyətində də yetərincə maraqlı simalar var. Onlardan biri Ömər Onandı.

Türkiyə basketbolunun tanınmış simalarından sayılan Onan hazırda Türkiyə Basketbol Federasiyasının başqan vəkili vəzifəsini icra edir. Onandan başqa siyahıda Mahmut Uslu, İlhan Ekşioğlu, Səlim Kosif, tanınmış siyasətçi Besim Tibukun qızı Hande Tibuk, Ülkər ailəsinin üzvü, gənc iş adamı Ahmet Özükuru qeyd etmək olar. Uslu, Ekşioğlu və Kosif zatən “Fənər” fanatlarına gözəl tanışdı. Onlar Əziz Yıldırım son dönəmində də klubda yönətici kimi çalışırdılar. Bu arada Yıldırımın son açıqlaması diqqət çəkib. O, “Fənərbaxça” həftəsonu çempion olacağı təqdridə prezidentliyə namizədliyini geri çəkəcəyini bildirib!

Bu arada Türkiyə Futbol Federasiyasının nəzdində fəaliyyət göstərən Nizam-İntizam Komitəsi son derbidə yaşanan qalmaqalla bağlı cəzaları açıqlayıb. Ötən sayımızda İstanbul valiliyinin “Qalatasaray” - “Fənərbaxça” derbisinin ardından yaşanan olaylarla bağlı araşdırmaya başladığını, eləcə də ümumilikdə 7 ismin NİK-ə sövq edildiyini xəbər vermişdik. Beləliklə, Əli Koça 90 gün və 780 min lirə para cəzası verilib! Amma bu cəza ona oyundan 1 saat sonra “Rams Park”a gələrək dava-dalaş saldığına görə yox, matçdan sonra klubun rəsmi “yutub” səhifəsinə qalmaqallı açıqlamaları üzündən verilib. Yönətici Səahəttin Bakiyə 32 gün, futbolçulardan Mərt Hakan Yandaşa 5, İrfan Can Eğribayata 3, Ceyden Oostervoldeyə 1 oyunluq cəzalar verilib! Ən sərt cəza ilə Əmrə Kartal üzləşib. Baş məşqçi İsmayıl Kartalın oğlu birilliyə səlahiyyətlərini icra etməkdən məhrum olunub! “Qalatasaray”ın məşqçilər korpusunda yer alan təhlilçi Sərhat Doğana isə 1 oyunluq cəza verilib.

Onu da bildirək ki, dünən “Fənər”in baş həkimi Ərtuğrul Karanlık, sabiq yönəticisi - Əli Koçun yeni idarə heyətində yer alan Hulusi Belgü, eləcə də Əmrə Kartal İstanbul Ədalət Sarayına gələrək derbidən sonra yaşanan olaylarla bağlı ifadə verdilər. Onlar yalnız 4 saat sonra, üstəlik jurnalistlərə yaxalanmamaq üçün gizli qapıdan çıxaraq ərazini tərk etdilər. Onların hər üçünün ölkəni tərk etməsinə qadağa qoyuldu!