Mayın 14-də Türkiyə kubokunun final matçı keçiriləcək. Qaziantep şəhərində baş tutacaq həlledici oyunda ''Trabzonspor''la ''Qalatasaray'' üz-üzə gələcək.

Böyük maraqla gözlənilən finalın hakimi açıqlanıb. Türkiyə Futbol Federasiyasının açıqlamasında bu oyuna Cihan Aydının təyinat aldığı qeyd olunub. VAR hakimi isə Tomaş Kvyatkovski olacaq.

Polşalı Kvyatkovski dünyanın ən təcrübəli VAR hakimlərindən biri sayılır. O, gələn ay start götürəcək Klublararası Dünya Çempionatına da dəvət alıb. VAR ilə bağlı olmasa da, əsas hakimlə bağlı narazılıqlar var. 33 yaşlı Cihan Aydın əslən Bursadandı. O, 2015-ci ildən peşəkar liqalara təyinat almağa başlayıb. Superliqada isə ilk matçına 2022-ci ildə çıxıb. O, ötən il FİFA hakimi statusunda idi. Amma bu ildən bu statusu itirib. Buna baxmayaraq federasiya bu ədalət təmsilçisinə önəmli oyunlar etibar etməkdə davam edir.

Əslində Cihan Aydın bərbad hakim deyil. Sadəcə ona ''Qalatasaray'' azarkeşi damğası vurulub. Ona görə də onun hər dəfə ''Qalatasaray''ın matçına təyinatı böyük söz-söhbətlərə səbəb olur. Məsələ burasındadı ki, 2022-ci ilin yanvarında Hakimlər Komitəsi tərəfindən keçirilən onlayn seminara Cihan Aydın qızı tərəfindən açılan bir hesab ilə daxil olmuşdu. Həmin hesabın adı isə ''Ən böyük GS Mira Aydın'' idi. Məhz bu olay artıq illərdi, Aydının başının üzərini ''domokl qılıncı'' kimi kəsdirib. ''Trabzonspor'' artıq bu təyinatdan kəskin narazılığını dilə gətirib. Kubokun 1/4 finalında ''Fənərbaxça'' - ''Qalatasaray'' derbisinə (1:2) də Aydın təyinat almışdı. Həmin oyundan öncə də ''Fənər'' cəbhəsinin ciddi narazılığı var idi. Amma Aydın o matçda nəticəyə təsir edən ciddi səhvə yol verməmişdi.

Ümumilikdə ''Cim-Bom'' indiyə qədər bu hakimin idarəçiliyi altında keçirdiyi 9 rəsmi oyunun heç birində uduzmayıb və bu oyunlardan 7 qələbə, 2 bərabərliklə ayrılıb. Digər tərəfdən ''sarı-qırmızılar''ın bu mövsüm superliqada xal itirdikləri 6 matçın ikisi məhz bu hakimin idarəçiliyinə təsadüf edib. Söhbət səfərdə ''Hatayspor'' (1:1) və ''Kasımpaşa'' (3:3) ilə oyunlarda qeydə alınan bərabərliklərdən gedir.

Maraq üçün bildirək ki, ''Trabzonspor'' indiyə qədər Cihan Aydının idarəçiliyində keçirdiyi 9 oyundan 5 qələbə, 1 heç-heçə, 3 məğlubiyyətlə ayrılıb.