Türkiyədə bir İstanbul derbisi bitsə də, qarşıdan daha bir derbi gəlir.

''Football-plus.az'' xəbər verir ki, şənbə günü superliqanın 29-cu turunda ''Beşiktaş'' 2:1 qalib gələrək ''Qalatasaray''ın məğlubiyyətsiz seriyasına son qoydu. Aprelin 2-də isə bu dəfə ölkə kubokunun 1/4 finalında ''Qalatasaray'' ''Fənərbaxça''nın qonağı olacaq.

Əzəli rəqiblərin fevralın 24-də çempionat çərçivəsində baş tutan oyununu bilindiyi kimi sloveniyalı Slavko Vinçiç idarə etmişdi. Amma belə görünür, Türkiyə Futbol Federasiyasının bundan sonra əcnəbi hakim dəvət etmək niyyəti yoxdu. Şənbə günkü derbini Yasin Kol idarə etmişdi. Onun həmin matçı yaxşı idarə etməsi və nəticəyə təsir edən səhvə yol verməməsi TFF-nin əlini-qolunu gücləndirib. Kubokdakı derbiyə isə Cihan Aydın təyinat alıb!

2014-cü ildən hakimliklə məşğul olan və əslən Bursadan olan 32 yaşlı ədalət təmsilçisi 2022-ci ildən superliqa oyunlarına təyinat alır. O, bu mövsüm 1-i 1-ci liqa, 20-si superliqada olmaqla 21 qarşılaşmada fit sahibi olub. Bu oyunlarda 84 sarı vərəqə, 4 qırmızı vərəqə göstəribsə, 8 penalti təyin edib. Aydın karyerasında ilk dəfə derbi idarə edəcək.

Amma təbii ki, buna qədər o, dəfələrlə həm ''Fənərbaxça'', həm də ''Qalatasaray''ın oyunlarını idarə edib. Göstəricilər təxminən bərabərdi. ''Sarı-lacivərdlilər'' bu hakimlə 7 oyundan 5 qələbə, 2 heç-heçə, ''sarı-qırmızılar'' isə 8 oyundan 6 qələbə, 2 heç-heçə ilə ayrılıblar. Amma hər iki komandanın son vaxtlar bu hakimlə çox önəmli xallar itirdiyini xatırlatmaq yerinə düşər. Məsələn, ''Qalatasaray'' Aydın ilə ilk 6 rəsmi oyunun hamısından qələbə ilə ayrılmışdı. Amma ''Cim-Bom'' son 2 oyunda (''Hatayspor''a qarşı 1:1, ''Kasımpaşa''ya qarşı 3:3) bu ədalət təmsilçisi ilə 4 xal itirib. ''Fənərbaxça''nın isə martın 16-da evdə ''Samsunspor''la qolsuz bərabərə qalaraq 2 mühüm xal itirdiyi oyunu məhz Aydın idarə etmişdi.

Maraqlıdı ki, Aydın ötən ilə FİFA kateqoriyasına aid idisə, bu il onun bu statusu əlindən alınıb. Daha doğrusu TFF-nin FİFA-ya göndərdiyi siyahıda dəyişiklik edilmiş və yanvardan etibarən Cihan Aydın FIFA kateqoriyalı hakimlər siyahısından çıxarılmışdı. Onu Mehmet Türkmən əvəzləyib.

Onu da bildirək ki, kubokda cavab oyunu yoxdu. Yəni növbəti mərhələyə yüksələn komanda elə Kadıköydə bəlli olacaq. ''Qalatasaray'' öz qrupunu 2-ci pillədə tamamladığı üçün ev sahibi olmaq hüququndan məhrum olub.