''Fənərbaxça''nın qış transfer dönəmində heyətinə qatdığı mərkəz müdafiəçilərindən Milan Şkrinyar özünü yaxşı tərəfdən göstərməyi bacarıbsa, Dieqo Karlosla bağlı günü-gündən suallar çoxalır.

Halbuki Şkrinyar klubda icarə əsasında top qovursa, məhz Karlos daimi əsasda heyətə cəlb olunub. Amma belə davam etsə, onun Türkiyə macərası cəmi 6 ay çəkəcək. Çünki Karlos həm ümidləri doğrultmur, həm də kluba çox baha başa gəlir. 32 yaşlı müdafiəçi ''Kayserispor'' və ''İstanbul BŞ'' ilə oyunlarda qazandığı şansı yaxşı dəyərləndirə bilmədi.

Bəzi epizodlarda çox kobud və peşəkar futbolçuya yaraşmayan səhvlərə yol verən Karlosun qazancı indi camiədə ən çox müzakirə olunan mövzulardandı. Təkcə bir faktı vurğulayaq ki, ''sambaçı'' klub tarixinin ən bahalı müdafiəçisidi. ''Fənər'' qışda onu ''Aston Villa''dan 11,5 milyon avroya transfer edib. İllik qazancı 4 milyon avro olan futbolçu cəmi bir neçə ay üçün 2 milyon avro qazanıb. Gəldiyi gündən bu yana zədə üzündən 15 oyun qaçıran Dieqo Karlos cəmi 5 rəsmi matçda 188 dəqiqə meydanda olub.

Klub büdcəsindən indiyə qədər bu futbolçuya ümumilikdə 13,5 milyon avro çıxdığını nəzərə alsaq, Karlosun meydanda keçirdiyi hər 1 dəqiqə ''Fənərbaxça''ya 72 min avroya başa gəlib! Türkiyə mətbuatının yazdığına inansaq, rəhbərlik onunla vidalaşmağın və bu ağır şərtlərdəki müqavilədən minimum zərərlə qurtulmağın yollarını axtarır.