Roma Papası futbol vurğunu idi - amma həmvətənlərini yox, Peleni seçmişdi
Roma Papası Fransisk aprelin 21-də - ömrünün 89-cu ilində Vatikandadkı qərargahında vəfat etdi. Pontifik ölümündən bir gün əvvəl Müqəddəs Pyotr bazilikasının eyvanına çıxaraq Pasxa ilə bağlı inanclı insanlara müraciət etdi.
"Football-plus.az" xəbər verir ki, mərhum Papa futbol vurğunlarından idi, vətəni Argentinanın tanınan klublarından “San-Lorenso”ya azarkeşlik edirdi. Düzdü, 1990-cı ildən bəri nəinki oyunlara, televizorda göstərilən heç bir verilişə baxmırdı. Ancaq oyunların nəticəsini köməkçilərindən öyrənirdi.
Fransisk fevralın 14-də nəfəs yollarınının infeksiyası diaqnozu ilə Romadakı Cemelli xəstəxanasına aparılmışdı. Sonradan pontikifə ikitərəfli pnevmoniya diaqnozu qoyuldu, həmçinin böyrək çatışmazlığı təsdiqləndi. Martın əvvəlindən bəri katolik kilsəsinin rəhbərinin səhhəti yaxşılaşmağa başladı. Onda Vatikanın mətbuat xidməti “Papanın çətinliklərə baxmayaraq, əhval-ruhiyyəsinin yerində olduğu və işləməyə davam etdiyi” ilə bağlı məlumat yaydı.
Xəstəxanadan martın 23-də buraxılan Papa, nəhayət, publika önündə görünməyə başladı. Dünya mediasının Papanın həyatı ilə bağlı yaydığı son xəbərlərdən biri memar Antonio Qaudinin kanonizasiyası haqda idi. Həmin mərasimi bitirmək mümkün olmadı.
Argentinada anadan olan Fransisk (və ya Xorxe Mario Berqoldo) uşaqkən həyatını futboldan kənarda təsəvvür etmirdi. Düzdü, elə bir futbol istedadına malik deyildi, bu üzdən əsasən qapıda dayanırdı.
Pontifik bütün qəlbi ilə “San-Lorenso”ya (əsası katolik keşiş tərəfindən qoyulub və müqəddəs Romalı Lavrentinin adını daşıyır) azarkeşlik edirdi. Ömrünün sonuna qədər bu komandanı dəstəkləyib, “San-Lorenso” 2014-cü ildə tarixində ilk dəfə Libertadorens kubokunu qazananda bayram edib. Düzdü, finala baxmayıb. Girişdə də vurğuladığımız kimi, Fransisk hələ 1990-cı ildə bir daha televizora baxmamağa qərar vermişdi.
Futbol daim onun həyatında olub. Papa Pele, Dieqo Maradona, Lionel Messi, Canluici Buffon, Kriştiano Ronaldo və başqa superulduzlar ilə görüşüb. Həmçinin Vatikanda Almaniya yığması qarışıq dəfələrlə futbol nümayəndə heyətlərini qəbul edib. Hədiyyə kimi götürdüyü futbol toplarının və formaların isə sayı-hesabı yoxdu. Formalardan birini ona şəxsən Ronaldonun anası təqdim edib.
2023-cü ildə Roma Papasından həmvətənləri – Maradona ilə Messi arasında seçim etməsini istəyiblər, ancaq o, çox gözlənilməz cavab verib:
“Pele. Maradona böyük futbolçu idi, ancaq insan kimi uğursuzluğa düçar oldu. Yazıq onu tərifləyən, amma yardım etməyən adamların gözü önündə büdrədi. Pontifikliyimin ilk ilində yanıma gəlmişdi. Messi çox düzgün adamdı, centlmendi. Ancaq mənim üçün ən böyük Peledi. Ürək idi. Hələ Buenos-Ayresdə olanda bir dəfə onunla təyyarədə qarşılaşdım. Adı böyük hərfə yazılmalı olan adamdı. Bunlar üç böyük dahidi. Hər birinin müəyyən özəllikləri var”.
Pontifik futbolla yanaşı, başqa idman hadisələrini də izləyirdi. Məsələn, 2021-ci ilin noyabrında Vatikan taekvondosu Ümumdünya Taekvondo Federasiyasının rəsmi üzvü oldu. Roma Papası Olimpiadanın startı ərəfəsində çıxış edib, boks üzrə britaniyalı Tayson Füri ilə ukraynalı Aleksandr Usıkın mübarizə apardığı çempionluq kəmərinə xeyir-dua verib. Fransisk milyardlarla adamın yaddaşında yalnız katolik kilsəsinin başçısı yox, həm də insanlığın, təvazökarlığın və sevginin – adamlara da, idmana da – rəmzi kimi qalacaq.
Digər xəbərlər
