Martın sonunda start götürən Braziliya çempionatında mübarizə getdikcə qızışır. Son on gündə keçirilən 4-cü və 5-ci turun oyunlarından sonra turnir cədvəlində ikihakimiyyətlilik pozuldu.
Son mövsümün bürünc mükafatçısı “Flamenqo” 3-cü turdan sonra digər şərikli lider “Palmeyras”dan çox qol vurduğu üçün 1-ci yerdə idi. Filipe Luisin komandası növbəti iki matçda hesabına 4 xal yazdı. Əvvəlcə evdə “Juventude”nin qapısından 6 cavabsız top keçirən rio de janeyrolular cari mövsümün ən böyükhesablı qələbəsini reallaşdırdılar. Lakin “Vasku da Qama” ilə növbəti matçda büdrədilər. Derbi başladığı hesabla sona çatdı. Maraq üçün yanvarda “Qarabağ”dan ayrılaraq “Flamenqo”ya keçən hücumçu Juninyonun son iki çempionat matçında meydana çıxmaq şansı qazanmadığını qeyd edək. Onun komandası qələbə seriyasını 4-ə çatdıra bilmədiyi üçün liderliyi əldən verdi.
Ona görə ki, iki tur əvvəl şərikli lider olan digər komanda növbəti oyunlarını masimum nəticə ilə başa vurdu. Əvvəlcə səfərdə “İnternasyonal”a minimal hesabla qalib gələn “Palmeyras” “Fortaleza”nı 2:1 hesabıyla məğlub etdi. Ötən mövsümün vitse-çempionu ardcıl 4-cü qələbə ilə vahid liderliyi ələ aldı. Xatırladaq ki, Abel Ferreyranın komandası mövsümə evdə son çempion “Botafoqo” ilə qolsuz heç-heçə etməklə başlamışdı.
İlk iki oyunda 4 xal toplayan “Botafoqo” üçün son iki tur uğursuz alındı. Renato Payvanın komandası evdə “San Paulu” ilə 2:2 hesabına razılaşandan sonra səfərdə “Atletiko Mineyro”ya minimal hesabla uduzdu. Yeni mövsümdə ilk 5 oyunda 2-ci məğlubiyyətini alan son çempion 3-cü turdan sonra olduğu 10-cu yerdən 15-ə düşdü.
Hesabat turundan sonra “Fluminense” ilə “Braqantino” hərəyə 10 xalla 3-4-cü yerləri bölüşürlər. Çempionatın autsayderi isə yalnız 1 xal toplaya bilən “Sport Resife”di.

4-cü tur
Flamenqo - Juventude 6:0
Pulqar, 13. Plata, 18. Danilo, 22. De Arraskaeta, 56. Pedro, 71; 81.
İnternasyonal - Palmeyras 0:1
Torres, 64.
Botafoqo RJ - San Paulu 2:2
Savarino, 24. İqor Jezus, 74 - Ferreyra, 21. Andre Silva, 45+13.
Seara - Vasku da Qama 2:1
Pedro Raul, 29; 81 - Veqetti, 90+2.
Mirassol - Qremio 4:1
Daniel Borges, 3; 81. Reynaldo, 21-p.; 78 – Breytveyt, 82.
Sport Resife - Braqantino 0:1
Juninyo Kapişaba, 13.
Korintians - Fluminense 0:2
Rene, 63. Aryas, 82-p.
Santos - Atletiko Mineyro 2:0
Ze İvaldo, 24. Barreal, 27.
Vitoriya - Fortaleza 2:1
Janderson, 37. Mateuzinyo, 74 – Dioqo Barboza, 48.
Kruzeyro - Bayya 3:0
Romero, 45+7. Kayo Jorje, 65; 76.

5-ci tur
Vasku da Qama - Flamenqo 0:0
Fortaleza – Palmeyras 1:2
Deyverson,70 - Torres, 45. Lopes, 56.
Atletiko Mineyro - Botafoqo RJ 1:0
Kuelyo, 48.
Korintians - Sport Resife 2:1
Depay, 46; 62 – Serjio Oliveyra, 45.
Qremio - İnternasyonal 1:1
Antoni, 38-öz qapısına – Alan Patrik, 66-p.
Juventude - Mirassol 2:2
Enio, 24. Batalya, 45+2 – Yuri Kastilyo, 34. Reynaldo, 72-p.
San Paulu - Santos 2:1
Ferreyra, 10. Andre Silva, 23 – Tikinyo Soares, 45+3-p.
Fluminense - Vitoriya 1:1
Kano, 39 – Lukas Braqa, 90.
Braqantino - Kruzeyro 1:0
Con Con, 15.
Bayya - Seara 1:0
Everton Ribeyro, 90+14-p.

1. Palmeyras 5 4 1 0 7-2 13
2. Flamenqo 5 3 2 0 11-2 11
3. Fluminense 5 3 1 1 6-4 10
4. Braqantino 5 3 1 1 6-4 10
5. Seara 5 2 1 1 7-6 7
6. Korintians 5 2 1 2 6-6 7
7. Kruzeyro 5 2 1 2 6-6 7
8. Vasku da Qama 5 2 1 2 6-7 7
9. Juventude 5 2 1 2 6-11 7
10. San Paulu 5 1 4 0 5-4 7
11. Mirassol 5 1 3 1 9-7 6
12. İnternasyonal 5 1 3 1 6-3 6
13. Bayya 5 1 3 1 5-7 6
14. Fortaleza 5 1 2 2 5-5 5
15. Botafoqo RJ 5 1 2 2 4-4 5
16. Vitoriya 5 1 2 2 6-8 5
17. Atletiko Mineyro 5 1 2 2 4-6 5
18. Santos 5 1 1 3 6-7 4
19. Qremio 5 1 1 2 4-10 4
20. Sport Resife 5 0 1 4 3-8 1
Bombardirlər: De Arraskaeta (Flamenqo), Pedro Raul (Seara), Veqetti (Vasku da Qama) - 4.