“Futbolçulardan narahat idim ki, belə atmosferdə oynamayıblar” – Elnur Abdullayev

2-ci liqanın 24-cü turunda “Şahdağ Qusar” səfərdə “Şəfa” ilə heç-heçə edib - 0:0.

“Football-plus.az” xəbər verir ki, qonaqların baş məşqçisi Elnur Abdullayev oyunsonrası mətbuat konfransında jurnalistərin suallarını cavablayıb.

- Komandaya gələndə qarşıma 1-ci liqaya vəsiqə və çempionluq hədəfi qoyulmuşdu. Çempionatın bitməsinə altı tur qalmış 1-ci liqaya yüksəlməyi rəsmiləşdirdik. “Şəfa” olmasaydı, çempionluğu da altı tur qalmış rəsmiləşdirərdik. Rəqibimiz çox güclüdü. Mənim üçün maddiyyat önəmlidi. Amma istək ondan da önəmlidi. Bu gün komandam istəkli idi. 1-ci turdan indiyədək məqsəd çempionluqdu. Əlimizdən gələni edirik. Deməzdim ki, çempionuq. Qarşıdakı oyunlarımız da çətindi. Rəqiblərimiz “Qusar” və “Dinamo”du. İnşallah çempion olarıq.

- 1-ci liqada məqsədiniz nə olacaq?
- Bu barədə heç nə deyə bilmərəm. Çünki rəhbərliklə danışmamışam. Rəhbərlik mənə büdcə qoymalıdı ki, “bu büdcə ilə bunu et”, məsələn, çempion ol. Yəqin ki, bir az sonra bu haqda danışacağıq.

- Özünüz futbol oynayanda bu atmosferi hiss etmisiz. İndi məşqçi kimi yaşadız. Nə düşünürsüz?
- Bu ab-havada “Xəzər Lənkəran”da oynamışam. Möhtəşəmdi. Futbolçulardan narahat idim ki, belə atmosferdə oynamayıblar. Azarkeşlərə sonsuz təşəkkürümü bildirirəm. Komanda uduza bilər, azarkeş olmalıdı. İnşallah, onları sevindirəcəyik.

- Rəqib komandanın sizin azarkeşlər üçün biletin qiymətini 10 manat təyin etməsi haqda nə deyə bilərsiz?
- Bir var azarkeş, bir də var fanat. Bunlar fanatdı. Fanatları incitməyin. Heç nəyi yadlarından çıxarmırlar. Həmişə yadlarında qalır. Möhtəşəm idilər. 12-ci oyunçu kimi yanımızda oldular. O işlərə qarışmaq istəmirəm. Bilet satmaq mənlik deyil. Düşünürəm ki, bizdə necə olmuşdusa, burda da elə olsaydı, yaxşı olardı. İnanıram ki, gələcəkdə belə hallar olmayacaq”.

MÜZƏFFƏR QULUZADƏ