“Qarabağ” Misli premyer-liqasının 33-cü turunda “Sumqayıt”ı məğlub etdi - 2:0.

“Football-plus.az” xəbər verir ki, meydan sahiblərinin baş məşqçisi Qurban Qurbanov oyunsonrası mətbuat konfransında jurnalistlərin suallarını cavablayıb.

- Futbolçularımı təbrik edirəm. Çoxdan bu stadionda oyunumuz olmurdu. Qələbə ilə geri dönmək heç də pis olmadı. Qarşımızda istəkli bir rəqib var idi. Məğlub olmağı xoşlamayan kollektiv gördük. Daha baxımlı oyun ola bilərdi. Yaxşı bir oyun oldu.

- Bu gün ilk dəfə Amin Rzayev rəsmi matça çıxdı. Sol müdafiəçi kimi oynatdız. Növbəti oyunlarda şans veriləcəkmi?
- Xeyli müddətdi bizimlədi. Məşqlərimizə cəlb etmişik. Milli ilə gedir, məşqlərimizdən qalır. Hələ ki gəncdi. Maksimum yüklənmələri qəbul edə bilmir. Formalaşması üçün vaxt lazımdı. Oynamaq potensialı var. Belə oyunçular vacibdi. Gələcək üçün özündən çox şey asılı olacaq. Qarşıdakı oyunlarda da imkan olanda şərait yaradacağıq. “Zirə” ilə yoldaşlıq matçında özünü daha sərbəst hiss edirdi. Təki özlərini yaxşı tərəfdən göstərsinlər.

- Ötən tur “Sabah”la oyundan sonra Bəhlulla olan məsələni sizin dilinizdən eşitmək istəyərdik…
- Problemli bir şey yoxdusa, açıqlama vermək artıq olar. Bəhlulla neçə ildi birlikdə işləyirik də, problemimiz yoxdu. Ona görə də açıqlama verməyə ehtiyac görmürəm.

- Balakişi Qasımovun rəhbərlik etdiyo İTV-də belə fikirlər səslənir ki, hakimlər sizə kömək edir…
- Balakişi Qasımov və İctimai TV mənim üçün fərqli bir şeydi. Balakişi mənim üçün düzgün insanlardan biridi. Düşünə bilmərəm ki, o, belə bir şey desin.

- Çempionluğu təmin etdiz. Necə qeyd edəcəksiz?
- Hər il olduğu kimi klub rəhbərliyi yaxşı təşkilatçılıq edəcək.

- Böyük bir mövsüm sona çatır. Media ilə yaxın münasibətdə olduz. Medianın ölkə futbolunun inkşafında rolunu necə dəyərləndirirsiniz?
- Qarşıda neçə tur var. Çempionatı başa vurmuş kimi özünüzü aparmayın. Hər bir idman növündə bir-birimizi tamamlamalıyıq. Həmişə mediaya uğurlar arzulamışam. Hər zaman razı qalmışam. Media xalqımızın vacib hissələrindən biridi. Heç vaxt media nümayəndələrinin yazdıqlarına şübhəm olmayıb. Futbolun inkişafı üçün ən böyük güc sahibisiz. İdmanımıza dayaq olun. Sizlərin yanında olmağa çalışmışıq. 150 illik yubileyinizə dəvət etsələr, gələrəm.

- “Qarabağ” - “Traktor” qardaşlıq matçının keçirilməsinin vaxtı çatıbmı?
- O barədə hər hansısa fikir bildirə bilməyəcəm. Onları da təbrik edirəm. Böyük uğur əldə ediblər. Belə bir komanda ilə yoldaşlıq oyunu keçirməyə şad olaram. Klub rəhbərləri tərəfindən müzakirə olunmalıdı.

ƏSƏD SEYİDOV