Misli premyer-liqasının 3-cü turunda cəmi üç oyun keçirildi.

Bilindiyi kimi, ölkəmizi avrokuboklarda təmsil edən “Qarabağ” (Çempionlar Liqası) və “Zirə” (Konfrans Liqası) pley-offda iştirak edəcəyindən bu turdakı qarşılaşmalarının təxirə salınmasını istədi və Peşəkar Futbol Liqası (PFL) da müraciəti müsbət qarşıladı. Bəs qalan görüşlərdə nələr yaşandı?
Ötən mövsümdən bəri doğma azarkeş dəstəyindən məhrum olan “Kəpəz” “Turan Tovuz”la ev matçını bu komandaya məxsus stadionda keçirmək məcburiyyətindədi. Oyunda nominal meydan sahibi “Kəpəz” olsa da, stadiondakı atmosfer tam tovuzluların xeyrinə idi. Kurban Berdıyevin gəlişiylə güclənən, özünəinamı artan “bozqurd” bu görüşdə də qələbə qazanmaqla “Zirə” və “Qarabağ”ın 1 oyun az keçirmiş fonunda liderliyə yüksəldi. Əslində “Turan Tovuz” bir o qədər yüksək məhsuldarlıq göstərmir. Üç oyunda 4 qol qibtəolunası məhsuldarlıq deyil. Sadəcə, Berdıyev futbolçularına müdafiə olunmağı da öyrədib. İlk üç turda tovuzluların qapısına yop tapan yoxdu. Gəncə təmsilçisi isə yeni “futbol ili”ndə hələ də xala həsrətdi. Bu gedişlə komandanın növbəti dəfə premyer-liqada yerini qoruyacağı çətin görünür. Ancaq ilk dövrə tamamlanmamış bu barədə fikir yürütməyin tez olduğu qənaətindəyəm.

“Sumqayıt” – “Səbail” matçının taleyi isə 5 dəqiqədə həll olundu. “Səbail” növbəti xalı qazanacağını umduğu halda məğlubiyyətlə üzləşdi. Belədə mövsümdə ikinci qələbəsini qazanan Samir Abasovun yetirmələri liderlərlər qrupunda qərarlaşıbsa, Şahin Diniyevin komandası hələ də autsayder rolunu oynayır. Hər iki komanda üçün çempionatın heç də asan keçməyəcəyi bəllidi. Yavaş-yavaş kartlar açılır. Zaman keçdikcə hər şey gün kimi aydınlığa çıxacaq.

“Neftçi”nin bu dəfə “Sabah”a məğlub olması Krunoslav Renduliçi futbol ictimaiyyətinin qınağından nisbətən uzaqlaşdırdığı halda, Roman Qriqorçuku birbaşa hədəf lövhəsi etdi. Məğlubiyyət bir yana, “ağ-qaralar”da məşqçi işi də yox dərəcəsindəydi. Doğrusu, “Sabah”ın oyununu da yaxşı adlandıra bilmərəm. Hesab edirəm ki, rəqib “Neftçi” yox, bəlli bir oyun sisteminə malik komanda olsaydı, “bayquşlar”ın qələbə qazanması çətin olacaqdı. Hər halda, bu qələbə həm avrokuboklardakı, həm də çempionatdakı uğursuz çıxışı unutdurmağa yardım edəcək. “Neftçi”nin aqibətinin necə olacağı isə bilinmir. Yenə də səbr etməyin yeri var. Heç olmasa, daha bir neçə tur.

Misli premyer-liqası
1-ci dövrə, 3-cü tur
17 avqust
Kəpəz – Turan Tovuz 0:3
Sumqayıt – Səbail 2:1
18 avqust
Neftçi – Sabah 0:2
“Şamaxı” – “Qarabağ”, “Zirə” – “Araz-Naxçıvan” oyunları təxirə salınıb.

1. Turan Tovuz 3 2 1 0 4-0 7
2. Qarabağ 2 2 0 0 7-1 6
3. Zirə 2 2 0 0 6-1 6
4. Sumqayıt 3 2 0 1 4-2 6
5. Sabah 3 1 1 1 4-4 4
6. Araz-Naxçıvan 2 1 0 1 2-4 3
7. Neftçi 3 0 2 1 1-3 2
8. Şamaxı 2 0 1 1 2-3 1
9. Səbail 3 0 1 2 3-7 1
10. Kəpəz 3 0 0 3 0-8 0

Bombardirlər: Davit Volkov (Zirə) – 3, Riçard Almeyda (Qarabağ), Xəyal Nəcəfov (“Turan Tovuz”) – 2.

Növbəti turun proqramı
23 avqust, 19.00. Səbail – Kəpəz
24 avqust, 18.15. Qarabağ – Turan Tovuz
24 avqust, 20.30. Araz-Naxçıvan – Neftçi
25 avqust, 18.15. Sabah - Sumqayıt
25 avqust, 20.30. Zirə – Şamaxı

KAMAL SƏFƏR