Misli premyer-liqasında 9-cu turla bağlı bir çox məqam var.

“Kəpəz” cari mövsümdə ilk qələbəsini qazanda da, “Neftçi” bunu bacarmadı. Biz əslində təkcə tura yox, dövrəyə yekun vurmalıyıq. Belədə isə gözən dəyən ilk mənzərə odu ki, “Qarabağ” fasiləyə öyrəşdiyi mövqedə, yəni lider kürsüsündə yollandı. Amma ağdamlıların ən yaxın izləyicilərinin “Turan Tovuz” ilə “Araz-Naxçıvan” olması təəccüb doğurur.

“Kəpəz” nominal meydan sahibi olduğu oyunda “Neftçi”dən üstün təsir bağışladı. Bakılılar hesabı açsalar da, hətta 2-ci dəfə önə çıxsalar da, sonradan oyunun axarı dəyişdi. Ardıcıl üç qol vuran gəncəlilər məğlubiyyət seriyasına son qoya bildi. “Ağ-qaralar” indi faciəvi durumdadı, necə deyərlər, bıçaq sümüyə dirənib. Dövrənin başa çatması ilə Roman Qriqorçukun vəzifəsindən ayrılması təəccüb doğurmadı. Belə nəticə ölkə futbolunun flaqmanı üçün qəbulolunmazdı.

Son dörd turda qələbəyə həsrət qalan “Səbail” evdə “Şamaxı”nı məğlub edə bildi. Ayxan Abbasovun çalışdırdığı komandanın bu şəkildə uduzması anlaşılmaz qaldı. Belə görünür ki, baş məşqçi ardıcıl uğurlu oyunlar seriyasından sonra yetirmələrini Bayıl səfərinə lazımınca kökləyə bilməmişdi.

Masazırda hər iki komanda 1 xalla kifayətləndi. “Sabah”la “Araz-Naxçıvan”ın yüksək yerlər uğrunda mübarizə apardığı heç kimə sirr deyil. Yalnız səfərdə “Qarabağ”a məğlub olan Elmar Baxşıyevin komandası bu dəfə də xal qazandı.

“Turan Tovuz” – “Zirə” oyunu da maraq doğururdu. Mövsümə fırtına kimi başlayan meydan sahibləri son üç turdakı xal itkisinin təsadüf olduğunu göstərmək istəyirdi. Düzdü, tovuzlular bunu bacardı. Amma ədalət naminə ilk yarının meydan sahiblərinin aşkar üstünlüyü şəraitində keçdiyini də deməliyik.

Turun son oyununu – “Sumqayıt”ın “Qarabağ”la qarşılaşmasını izləmək üçün tribunalara 7 min azarkeş toplaşmışdı. Onlar “Sumqayıt”ın növbəti məğlubiyyətini izləsələr də, bir o qədər narazı qalmadılar. Axı Samir Abasovun çalışdırdığı komanda indi autsayder statusunu daşıyır.

Misli premyer-liqası
1-ci dövrə, 9-cu tur
4 oktyabr
Kəpəz – Neftçi 4:3
5 oktyabr
Səbail – Şamaxı 2:0
Sabah – Araz-Naxçıvan 1:1
6 oktyabr
Turan Tovuz – Zirə 1:0
Sumqayıt – Qarabağ 0:1

1. Qarabağ 8 7 0 1 20-6 21
2. Turan Tovuz 9 5 3 1 12-6 18
3. Araz-Naxçıvan 8 5 2 1 11-9 17
4. Zirə 8 5 0 3 14-6 15
5. Sabah 9 4 3 2 19-15 15
6. Şamaxı 8 3 3 2 8-7 12
7. Səbail 9 2 1 6 14-17 7
8. Sumqayıt 9 2 1 6 6-11 7
9. Neftçi 9 0 5 4 6-15 5
10. Kəpəz 9 1 0 8 6-24 3

Bombardirlər: Coy-Lens Mikels, Cesse Sekidika (hər ikisi “Sabah”) – 5, Davit Volkov, Rafael Utziq (hər ikisi “Zirə”), Pavol Şafranko (Sabah) – 4.

Növbəti turun proqramı:
18 oktyabr, 18.00. Kəpəz – Qarabağ
19 oktyabr, 15.30. Şamaxı – Araz-Naxçıvan
19 oktyabr, 18.00. Neftçi – Səbail
20 oktyabr, 17.30. Zirə - Sabah
20 oktyabr, 20.00. Sumqayıt – Turan Tovuz

ƏSƏD SEYİDOV