55 ildi peşəkar futbol klubu kimi fəaliyyət göstərən “Traktor” tarixində ilk dəfə İran çempionatının qalibi olmağa çox yaxındı. Bu komanda son illərdə dəfələrlə “qızıl”a yaxınlaşsa da, hər dəfə sonda hansısa səbəbdən ya 2-ci olub, ya da 3-cü.

Bəs nə yaxşı farslar bu il “qırmızı qurdlar”ın yoluna daş-kəsək düzməyib?

Yüz illərdi farsların hakimiyyəti altında olan İran İslam Respublikasının indiki prezidenti (yeri gəlmişkən, dünəndən ölkəmizdə rəsmi səfərdədi) Məsud Pezeşkian türk mənşəlidi. Özünə də türk deyir. Pezeşkian hakimiyyətə 2024-cü ilin iyulunda gəlib. “Traktor” isə Təbriz klubu, Güney Azərbaycan türklərinin qürurudu. Belə çıxır ki, İran futboluna rəhbərlik edənlər bu amili də nəzərə alır, ölçür-biçir.

Hər şey çox aydın şəkildə görünür. Buna qədər “Traktor”un çempion olması üçün kömək etmək lazım deyildi. “Ayağından dartmamaq”, haqsızlıq etməmək kifayət idi. Bu mövsüm vəziyyət belədi. Və ya demək olar ki, belədi.

Yeri gəlmişkən, “Traktor”un sosial şəbəkə hesablarında azarkeşləri mayın 8-də küçələrə səsləməklə bağlı çağırışlar çoxdu. Yəqin ki, onlar öz məhşur şüarlarını səsləndirəcəklər. Bəs niyə məhz mayın 8-i? Həmin gün Mazandaran təmsilçisi “Nassaji”ni qəbul edəcək “Traktor”un çempionluq qazanması tam realdı. Hələlik isə sona üç tur qalır və “Traktor” 61 xalla zirvədədi. “Sepahan” 56 xalla 2-ci pillədə qərarlaşıb.

MÜZƏFFƏR QULUZADƏ