31-ci turu intizam sanksiyaları baxımından ideal saymaq olmaz. 20 sarı, 2 qırmızı vərəqə - bu statistika hər şeyi “deyir”.

Hakim qərarlarının ədalətli olub-olmamasına gəlincə, cəzadan dönən Əliyar Ağayev Elmar Baxşıyevin qınağına tuş gəldi. Öz aramızdı, “Araz-Naxçıvan”ın baş məşqçisinin hakimlərdən yeri gəldi-gəlmədi narazılıq etməsinə artıq öyrəşmişik.

Araz-Naxçıvan – Turan Tovuz, ƏLİYAR AĞAYEV
Avrokuboklara yollanmaq istəyən komandalar mövsümün sonuna qədər arxayın olmaq istəyirsə, azı 3-cü pillədə qərarlaşmalıdı. Bu üzdən Mərdəkanda amansız mübarizəyə şahidlik edəcəyimizə şübhə yox idi. İş ondadı ki, qələbəyə daha çox ehtiyac duyan “Turan Tovuz” rəqibin azlıqda qalmasına baxmayaraq, risk etməkdən çəkindi və 1 xala qane oldu. Təbii ki, bu hesab naxçıvanlılar üçün daha sərfəlidi. Qələbə qazana bilməyən “Turan Tovuz” hakimdən narazı qalmadı. Elmar Baxşıyev isə Vanderson Melonun 2-cı “sarı”sının “ucuz sarı vərəqə” kimi dəyərləndirdi. Qınamayın, amma Əliyar Ağayev bu dəfə ağ vərəq kimi təmizdi. Yox, qınayacaqsızsa, Melonun ətəyindən yapışın. Çünki İsmayıl Zülfüqarlı ilə mübarizədə kobudluq artıq idi.

Qarabağ – Neftçi, ELÇİN MƏSİYEV
“Qarabağ”ın üstünlüyü şəraitində keçəcəyini proqnozlaşdırdığımız Azərbaycan derbisi nə komandaların oyun tərzi, nə də hesab baxımından bizi yanıltdı. Düzdü, 90 dəqiqə ərzində xeyli sayda yüngül və kobud qayda pozuntuları qeydə alındı. Lakin bunun Elçin Məsiyevin işini böyük ölçüdə çətinləşdirdiyini deyə bilmərik. Hiss olunurdu ki, ədalət təmsilçisi matçın dinamik və sürətli keçməsində maraqlıdı. O, bu üzdən xüsusilə 1-ci hissədə hər iki komandanın oyunçularına münasibətdə mərhəmətli davrandı ki, nəticədə Samir Abasovun etirazıyla üzləşdi. Mütəxəssis fasilədə baş hakimə yaxınlaşaraq irad bildirdiyi üçün sarı vərəqəni haqq etdi. İstənilən halda, Məsiyev nə hansısa ayrı-seçkiliyə yol verdi, nə də müzakirəyə açıq qərarla yadda qaldı.

Şamaxı – Kəpəz, CAVİD CƏLİLOV
Elitada qalmaq uğrunda mübarizə aparan komandaların dueli yetərincə gərgin keçdi. O başqa məsələ ki, “Şamaxı” həm meydan sahibi statusundan, həm də sabit nəticə qazanmaqda rəqibdən daha uğurlu olmasından layiqincə yararlandı və lazım olan xalları qazandı. “Şirlər” Dieqo Verdaşkaya qarşı kobudluq edən Maykl Tuikin meydandan qovulmasıyla barışdı ki, məhz belə olmalıydı. Ümumiyyətlə, Cavid Cəlilovun ciddi səhvlə yadda qaldığını demək olmaz. Şamaxılı azarkeşlərin “şirlər”in əleyhinə verilən hər qərarı etirazla qarşılaşamasına isə artıq öyrəşmişik.

Sabah – Səbail, FƏRİD HACIYEV
Baxımlı keçən oyunda komandalar ciddi qayda pozuntusuna ehtiyac duymadı. Hər birinin qaydalara uyğun performans sərgiləməsi Hacıyevin də işini asanlaşdırdı. Fərid bəy epizodlara yetərincə yaxın idi, hadisələrin axarına nəzarət edirdi. Beş sarı vərəqə göstərdi ki, buna görə referiyə irad tutmaq çətindi. Hacıyevin köməkçiləri də işinin öhdəsindən layiqincə gəldi.

Zirə - Sumqayıt, RAUF CABBAROV
Ədalət təmsilçiləri məsuliyyətin altında əzilmədilər. Onsuz da mübarizənin əsasən meydanın “Sumqayıt”a aid hissəsində getməsi baş hakimin işini asanlaşdırmışdı. Buna görə də oyunun idarə olunmasında heç bir çətinlik yaşanmadı. Cabbarov futbolçulara 3 sarı vərəqə göstərdi ki, verdiyi qərarlarda da haqlı idi. Referi Rəşad Sadıqova xəbərdarlıq etməli oldu. Salifu Suma 89-cu dəqiqədə 3-cü qolu vurarkən qonaq futbolçular ofsayd iddiasında olsalar da, qol qaydalar çərçivəsində vurulmuşdu. Ümumilikdə ziddiyyətli, mübahisəli epizod qeydə alınmadı.