Gəncəli azarkeşlər indidən "Kəpəz"lə bağlı onları gözləyən yeniliklərə hazır olmalı, növbəti mövsümü, necə deyərlər, iplə çəkməyə başlamalıdı. Ona görə ki, bu yaxınlarda premyer-liqada qalmaq hədəfinə böyük ölçüdə çatan klubda struktur dəyişikliyi baş verib.

"Football-plus.az"ın əldə etdiyi məlumata görə, Gəncə təmsilçisinin idarə heyəti ləğv olunub və əvəzində Müşahidə Şurası yaradılıb. Tanınmış iş adamı, FCHAİN (“Financial Chain Corporation”) şirkətinin təsisçisi və baş icraçı direktoru Namik Qədirov Müşahidə Şurasının sədri təyin edilib. Klubun idarə heyətinin sabiq sədri İlqar Nadiri də Müşahidə Şurasında təmsil olunacaq.

Maraqlıdı ki, burda "sarı-göylər"in icraçı direktoru Cabir İbrahimova hələ yer verilməyib. Qısası, mövsümün sonunda müqaviləsinin müddəti başa çatacaq funksionerə yol görünə bilər. Son bilgiyə görə, klubun yeni söz sahibləri onunla çalışmağa davam etmək istəmir.

Bəs işlər mövsümün sonuna qədər necə nizamlanacaq? Çox sadə: hələ ki xəbərin ictimaiyyətə rəsmən açıqlanması nəzərdə tutulmur. Bu üzdən hər kəs öz işini görməyə davam edəcək. Sadəcə, yeni rəhbərliyin gözü hadisələrin axarındadı. Hətta Namik Qədirovun təlimatına uyğun olaraq, tanınmış menecer Erkin İbrahimov komandanın bütün oyunlarında iştirak etməklə yanaşı, başqa prosesləri də yaxından izləyir. Təbii ki, mövsüm bitəndən sonra bu məsələylə bağlı bütün detallar ictimaiyyətə elan ediləcək. Elə Erkin İbrahimovun da klubda yüksək vəzifələrdən birinə, böyük ehtimalla, idman direktoru postuna təyinatı reallaşacaq.

Klubun növbəti "futbol ili" üçün hədəfi birmənalı şəkildə avrokuboklara yollanmaqdı. Artıq bu yöndə müəyyən planlar cızılıb. Mövsüm bitər-bitməz baş məşqçi və futbolçular ilə bağlı qərar veriləcək, ilk "üçlük" uğrunda mübarizə aparacaq kollektivin formalaşdırılması üçün işlərə başlanılacaq.

KƏNAN BAHADIR