“Kəpəz”də sular durulmaq bilmir. Sabiq məşqçi Azər Məmmədovun isfeasından sonra yeni dəyişikliklər də gündəmdədi. Gəncə Futbol Akademiyasının direktoru Cabir İbrahimovun səlahiyyətlərinin artırıldığını və təkcə burda yox, ümumiyyətlə, “Kəpəz”də söz sahibi olduğunu yazmışdıq.

Bununla bağlı "Football-plus.az"a daha bir maraqlı informasiya daxil olub. Sən demə, klubun idman direktoru postu əvvəlki çalışdırıcı Azər Məmmədova təklif edilib. Lakin, mütəxəssis bunu qətiyyətlə rədd edərək “Kəpəz”də hansısa işdə çalışmaq istəmədiyini bildirib. Yalnız bundan sonra Cabir İbrahimov amili ön plana çıxıb. İndiki durumda prosesin gedişatı İdarə Heyətinin sədri İlqar Nadirinin istefa verməsiylə nəticələnə bilər. Bunun səbəbi sponsorsuz klubun çox çətin durumda olması və bütün məsuliyyətin onun üzərində qalmasıdı. Həmçinin, o, gəncəli azarkeşlərin istefa tələbindən yaxa qurtarmaq istəyir. Bunu yubadan səbəb isə boş qalacaq postlar üçün heç kimin razılıq verməməsidi.

Digər tərəfdən, İlqar Nadiri çalışmaqda könüllü olan şəxsləri komandadan uzaqlaşdırıb. Bizdə olan bilgiyə görə, Etibar İbrahimov karyerasına “Kəpəz”də davam etmək niyyətində imiş. Lakin, klubun təklif etməməsiylə məşqçinin arzusu həyata keçməyib. İndi hər kəs səbrsizliklə Cabir İbrahimovun atacağı addımları gözləyir. Çox güman ki, ilk iş İlqar Nadirin aram-aram İdarə Heyətindən uzaqlaşdırılması olacaq.

KƏNAN BAHADIR