Türkiyə Futbol Federasiyası Türkiyə kubokunun finalına ev sahibliyi edəcək stadionu açıqlayıb.

Xatırladaq ki, həftəiçi keçirilən yarımfinallarda ''Konyaspor''u məğlub edən ''Qalatasaray'' və ''Göztəpə''ni məğlub edən ''Trabzonspor'' finala vəsiqə qazandı. Həlledici görüş mayın 14-də baş tutacaq.

Stadiona gəlincə, finala ''Qaziantep Böyükşəhər Stadionu'' ev sahibliyi edəcək. 2017-ci ildə istifadəyə verilən və 35 min azarkeş tutumuna malik olan buyarena ilk dəfə kubokun finalını qəbul edəcək. Ümumiyyətlə, Qaziantep şəhəri indiyə qədər heç vaxt kubokun finalına ev sahibliyi etməyib.

Qeyd edək ki, TFF daha öncə finalın ''Yeni Əskişəhər Stadionu''nda oynanılacağını açıqlamışdı. Amma bu qərar xüsusilə ''Trabzonspor'' cəbhəsində birmənalı qarşılanmamışdı. Çünki ''Trabzonspor''la ''Əskişəhərspor'' arasında uzun illərdi, davam edən ədavət var. Həm də Əskişəhər valiliyi final ilə bağlı təhlükəsizliyə zəmanət verə bilmədi. Bu üzdən TFF əvvəlki qərarını dəyişərək finalın Qaziantepə salındığını açıqladı.