Məlum olduğu kimi ''Trabzonspor''un U-19 komandası tarix yazaraq UEFA Gənclər Liqasında yarımfinala yüksəlib.

''Football-plus.az'' xəbər verir ki, buna qədər bu turnirdə nəinki yarımfinal, heç 1/4 finala da yüksələn Türkiyə təmsilçisi olmamışdı. ''Dördlər finalı'', yəni həm yarımfinallar, həm də final matçı İsveçrənin Nyon şəhərində keçiriləcək.

''Trabzonspor'' yarımfinalda ''Zaltsburq'' ilə qarşılaşacaq. Bu oyun aprelin 25-də ''Kolovrey'' idman mərkəzində yerləşən stadionda keçiriləcək və Bakı vaxtı ilə saat 16.00-da başlayacaq. Bu arada ''Trabzonspor'' rəhbərliyinin stadionun dəyişdirilməsi üçün UEFA-ya müraciət etdiyi məlum olub. Məsələ burasındadı ki, matçın oynanılacağı stadion cəmi 7200 azarkeş tutumuna malikdi. Bu isə ''Trabzonspor'' üçün çox azdı.

Xatırladaq ki, 1/4 finalda ''Trabzonspor''un doğma meydanda ''İnter''i məğlub etdiyi qarşılaşmada ''Papara Park'' stadionunda turnirin azarkeş rekordu qırılmışdı. Oyunu izləməyə 40368 azarkeş gəlmişdi. ''Trabzonspor''un Avropada da böyük azarkeş kütləsinə malik olduğunu nəzərə alsaq, komanda Gənclər Liqasının yarımfinalında hətta 50 minlik stadionu da təkbaşına doldurmağa qadirdi. Ancaq ''61 saat''ın məlumatına görə ''Trabzonspor''un bütün cəhdlərinə baxmayaraq UEFA yarımfinalın stadionunu dəyişməkdən imtina edib.

Avropanın ali futbol qurumu Nyonda yarımfinala ev sahibliyi etməyə qadir olan başqa stadionun olmadığını əsas gətirərək ''bordo-mavililər''in tələbini geri çevirib.