“Azarkeş heç bir halda “Neftçi”nin bu halıyla barışmayıb” – bəs niyə susduz?
“Neftçi” ölkə kubokunun yarımfinalının cavab oyununda “Sabah”la heç-heçə etdi və ilk oyunun nəticəsinə görə mübarizəni dayandırdı. Bununla “ağ-qaralar” həm də avrokuboklara yollanmaq şansını ardıcıl ikinci mövsüm də əldən verdi.
Maraqlıdı ki, daim tələbkarlığıyla seçilən “Neftçi” azarkeşləri bu dəfə hadisələrə nisbətən laqeyd yanaşdı. Dünən tribunalarda nə “istefa” şüarı səsləndirildi, nə də durumla bağlı hansısa etiraz əlaməti gördük.
Görəsən, bu, nə ilə bağlıdı? Tərəfdarlar artıq durumu qəbul edib və “ağ-qaralar”dan gözləntilər minimum səviyyəyə enib? Yoxsa rəhbərliyin növbəti mövsümlə bağlı vədləri azarkeşləri bir qədər də gözləməyə vadar edir?
“Football-plus..az”ın suallarını “Neftçi” Azarkeş Dərnəyinin rəhbəri Kənan Hənifəyev cavabladı:
“Bu oyunu “Neftçi”nin avrokuboklara yollanmaq üçün son şansı və mövsümün axırıncı matçı kimi qəbul edirdik. Premyer-liqada qalan turlarda qeydə alınacaq nəticələrdən asılı olmayaraq, tunir cədvəlində hansısa hərəkətliliyin önəmi qalmadı. Mövsüm bitdi! Azarkeşlər “futbol ili”nin başlanğıcından bəri problemləri görürdü və sonda belə olacağını proqnozlaşdırırdı. Buna baxmayaraq, komandanın inkişafı və çətin durumdan xilas olması üçün məsul şəxslərlə görüşmüşük və fikir mübadiləsi aparmışıq. İndi əlavə sözə ehtiyac qalmayıb. Komanda üçün yararsız olan futbolçular və məsul şəxslər təcili yola salınmalıdı. Azarkeş heç bir halda “Neftçi”nin bu halıyla barışmayıb. Biz həm tribunada, həm də tribunadan kənarda mübarizə aparırıq. Müşahidə Şurası bu mövsümlə bağlı ciddi təhlil aparmalı, səbəbkarları tapıb dərhal klubdan uzaqlaşdırmalı və “yol xəritəsi” hazırlamalıdı. Baş məşqçi Samir Abasovun qarşısına konkret hədəf qoyulmalı, istədiyi heyəti formalaşdırması üçün zəmin yaradılmalıdı. Ümumiyyətlə, rəhbərlik uzun müddəti əhatə edən plan hazırlamalıdı. İndiki resurslarla yola çıxmaq düzgün deyil. Ümid edirik ki, mövsüm başa çatandan sonra rəsmi açıqlamalar, radikal dəyişikliklər görəcəyik”.
KƏNAN BAHADIR
