Bu gün futbol üzrə ölkə kubokunda qalib müəyyənləşib.

Bilindiyi kimi, final matçında üz-üzə gələn komandalar həm də geridə qoyduğumuz mövsüm elitanın ən güclüləri olan “Qarabağ” və “Zirə” olub. Qarşılaşma “CBC Sport” telekanalı vasitəsilə canlı yayınlanıb.

ölkə kuboku, final
2 iyun
Qarabağ – Zirə 2:1
Olavio Juninyo, 42, Abdullah Zubir, 62 - İsmayıl İbrahimli, 58
Cəzalılar: Yassin Benzya (Qarabağ), Vladislav Kulaç (Zirə).
Bakı. “Liv Bona Dea Arena”. Saat 20.00.

İlk növbədə onu vurğulayaq ki, bu oyunla bağlı hansısa strateji hədəf yoxdu. “Qarabağ”ın Çempionlar, “Zirə”nin Avropa Liqasında oynayacağı hər kəsə bəllidi. Yəni mümkün qələbə onlardan hansınısa turnir hədəfinə çatdırmayacaq. Məhz bu məqam komandaların meydana daha sərbəst, rahat çıxmasını və istisnasız titul uğrunda oynamasını şərtləndirəcək. Çox qəribə psixoloji durum yaranır: “Qarabağ”ın heyətində dəfələrlə kubok qazanan futbolçular varsa, “Zirə”nin heyətində belələrinin sayı azdı (Ruan Renato, Rafael Utziq, İsmayıl İbrahimli, Anar Nəzirov). Təcrübə çox önəmli amildi. Amma eyni zamanda kuboku dəfələrlə qazanan futbolçu ilə ona ilk dəfə toxunmağa çalışan futbolçunun motivasiyası eyni olmur. Bu mənada “qartallar” bir addım öndədi.

Bəli, “köhlən atlar” premyer-liqa çempionudusa, “qartallar” ikinci pillənin sahibi olub. Lakin kubok matçlarının fərqli ab-havada keçdiyini diqqətdə saxlamalıyıq. “Qarabağ” mövsüm ərzində MOİK, “Sabah” və “Neftçi” kimi iddialıları mübarizədən kənarlaşdıraraq yumruğunu möhkəm çırpıb. “Zirə” isə “Turan Tovuz”, “Səbail” və “Qəbələ”ni məyus etməyi bacarıb. Əlbəttə, bununla “qartallar”ın uğurunu kiçiltmirik. Amma qəsəbə təmsilçisinin finala aparan yolda ciddi təzyiqlə üzləşdiyini demək doğru olmaz. Yəni Rəşad Sadıqovun komandası bu mövsüm kubokun gərginliyini yaşamayıb. Qısası, oyunu “Zirə” üçün ən çətin sınaq kimi xarakterizə edə bilərik. “Qarabağ”a gəlincə, Qurban Qurbanovun komandası matçın aşkar favoritidi. İddiamızın səbəbi həm premyer-liqadakı performans baxımından səviyyə fərqi, həm də “köhlən atlar”ın məhz bu turnirdə ciddi təcrübə sahibi olmasıdı. Bu məqamda futbolda xeyli proqnozun yanıldıcı ola biləcəyini xatırlatmaqda fayda var. Çünki kollektivlərin motivasiya axtardığı məqamlar da qalibin adına aydınlıq gəlməsində mühüm rol oynaya bilir. Bu mənada “Qarabağ”ın “qızıl dubl” arzusu, “Zirə”nin ilk dəfə belə uğura imza atmağa çox yaxın olması diqqəti çəkir! Yeri gəlmişkən, bu komandaların yolu kubokda yalnız bir dəfə kəsişib. İki il əvvəlki finalın 120 dəqiqəsi qollu heç-heçə ilə bitib və mükafatın sahibi penalti seriyasında müəyyənləşib. Bir sözlə, “Qarabağ” 7-ci dəfə kuboku başı üzərinə qaldıra bilib. Görəsən, bu dəfə qalib kim olacaq? Ağdamlılar altıncı “qızıl dubl”unu rəsmiləşdirəcək, yoxsa zirəlilər tarixində ilk dəfə kuboka sahib çıxacaq?

Maraqlıdı...
* “Qarabağ”la “Zirə” ölkədaxili yarışlarda 37-ci dəfə qarşılaşacaq. Komandalar indiyədək 36 dəfə görüşüb. Bunların 35-i premyer-liqaya, 1-i kuboka təsadüf edib. “Qarabağ” 23, “Zirə” 1 dəfə qalib gəlib, 12 qarşılaşma heç-heçə bitib. Yeganə kubok görüşündə də sülh qeydə alınıb. İki il əvvəl finalda üz-üzə gələn rəqiblər kubokun taleyinə penalti seriyasında aydınlıq gətirib. Daha dəqiq olan “Qarabağ” titula yiyələnib. Əvvəlki matçlarda ağdamlılar 71, paytaxt təmsilçisi 18 qola imza atıb.
* Kubokun iki finalçısından yalnız biri əvvəllər də bu titula sahib olub. “Qarabağ” yarışın 7 qat qalibidi. Ağdamlılar bu göstəricidə mütləq rekordçudu. Bölgə təmsilçisi rekordunu yeniləməklə başqaları ilə fərqi artırmağa çalışacaq. “Zirə” tarixinin ilk kubokunu qazanmaq şansına malikdi. Bakı klubu bunu bacarsa, yarışın qalibi adını qazanacaq 10-cu komanda kimi tarixə düşəcək. Belə ki, 1992-ci ildən keçirilən yarışda 9 klub qalib adına sahib çıxıb: “Qarabağ” – 7, “Neftçi” – 6, “Kəpəz” – 4, “Xəzər Lənkəran”, “Bakı” – 3, “Keşlə” (indiki “Şamaxı”), “Qəbələ” – 2, “İnşaatçı” B, “Şəfa” – 1.
* “Qarabağ” 1993, 2005/06, 2008/09, 2014/15, 2015/16, 2016/17, 2021/22 mövsümlərində kubokun qalibi olubsa, 1995/96, 1997/98, 1999/2000 mövsümlərində finalda uduzub. “Zirə”, sadəcə, 2021/22 mövsümündə finala qədər gələ bilib.
* Ölkə kubokunun 2023/24 mövsümündə 140 qol vurulub. Bu, son 16 turnir üçün mütləq rekorddu. Sonuncu dəfə daha çox qolun vurulması 2007/08 mövsümündə qeydə alınıb. Həmin vaxt bu rəqəm 180-ə bərabər olub.

KƏNAN BAHADIR