Modriç “Suonsi”nin səhmdarları sırasına qoşuldu
Dünya futbolunun ulduzlarından biri Luka Modriç gözlənilməz qərar verib.
Xorvat futbolçu “Suonsi”nin minoritar səhmdarları sırasına qoşulub. Maliyyə detalları açıqlanmasa da, Lukanın Uels klubunun həmsahibləri sırasında olduğu bəllidi. Onun tərəfdaşları isə Endi Koulman, Brett Kravatt, Naycel Morris və Ceyson Koendi.
Modriç sövdələşmə gerçəkləşəndən sonra bunları deyib:
“Bu, möhtəşəm imkandı. “Suonsi”nin güclü identikliyi, qeyri-adi fanat bazası və ən yüksək səviyyədə çıxış etmək həvəsi var. Təcrübəmi bölüşə biləcəyimə ümid edirəm. Hədəfim klubun yüksəlişinə dəstək vermək, parlaq gələcəyini qurmaqdı”.
“Suonsi” hazırda çempionşipin ortababları sırasında qərarlaşıb – 42 turdan sonra 24 komanda arasında 12-ci yerdədi. İnsayder Fabritsio Romanonun yazdığına inansaq, bu investisiya Modriçin gələcək karyerası ilə heç bir şəkildə bağlı deyil. 39 yaşlı xorvatiyalı “Real”la bu yay bitəcək müqavilə müddətini uzatmağı arzulayır.
“Marca” bir müddət əvvəl Lukanın məhz “Real”ın futbolçusu kimi DÇ-2026-da oynamaq istədiyini xəbər verib. Ancaq Madrid klubu müqavilə müddətini uzatmağa qərar verməsə, “Suonsi” Luka üçün ehtiyat variantlardan biri ola bilər. Uels klubu hələ ki ona yalnız vacib səhmdarlardan biri kimi baxır. “Suonsi”nin bununla bağlı yaydığı açıqlamada deyilir:
“Lukanın investisiyası klubun ambisiyalarının və yanaşmasının təsdiqidi. O, həlledici rol oynayacaq, kluba dünyanın diqqətini artıracaq, həm meydanda, həm də meydandan kənarda tərəqqiyə yardım edəcək”.
Klubun icraçı direktoru Tom Qorrinq əlavə edir:
“Oyunçularımız – akademiyadan birinci komandaya qədər – üçün bundan yaxşı ruhlanma mənbəyi ola bilməz. Onun ambisiyalarımıza dəstək verməsi, bu yolda bizi ruhlandırması böyük əhəmiyyət daşıyır, ona görə ki, nəticələrimizi yaxşılaşdırmağa çalışırıq. Birgə söhbətlərimizdə o, kluba ehtirasını, işimizə marağını göstərib, səmimi şəkildə bizə mükəməlləşmək baxımından yardım etmək istəyir”.
Xatırladaq ki, “Suonsi” İngiltərə futbolunun elitasında sonuncu dəfə 2017/18 mövsümündə mübarizə aparıb və həmin vaxtdan bəri çempionşipdədi. Uels klubu heç cür elitaya qayıda bilmir. Baxmayaraq ki, son illərdə “sükan arxasında” Qrem Potter, Stiv Kuper və Rassel Martin kimi məşhur mütəxəssislər olub. “Suonsi” bir neçə dəfə pley-offa dayanıb, hətta finalda uduzduğu vaxt da olub.
Digər xəbərlər
