Türkiyənin 1-ci liqasında 35-ci turun oyunları keçirilir.

Həmyerlimiz Vüsal İsgəndərlinin şərəfini qoruduğu ''Boluspor'' ''Fatih Karagümrük'' üzərində minimal hesablı qələbə qazanaraq pley-off yolunda çox vacib 3 xal əldə etdi.

''Football-plus.az'' xəbər verir ki, bu nəticə ilə həm də elitaya vəsiqə qazanan ilk klubun adına rəsmən aydınlıq gəldi. İkinci pillədə qərarlaşan ''Fatih Karagümrük'' 60 xalda qaldı. Bu da o deməkdi ki, 69 xala malik olan ''Kocaelispor'' bu turun oyununu keçirmədən Türkiyə çempionatına vəsiqəni təmin etdi.

Kocaeli təmsilçisi son olaraq 2008/09-da Türkiyənin ən yüksək liqasında oynamışdı. 1966-cı ildə yaradılan və ilk dəfə 1980/81-də elitada oynayan ''Kocaelispor'' ümumilikdə Türkiyə çempionatında 21-ci mövsümünü keçirəcək. 1990-cı illər, eləcə də 2000-ci illərin əvvəlləri bu klubun qızıl dönəmi hesab olunur. Həmin illərdə bu kollektiv yüksək pillələri tutaraq Türkiyəni UEFA kuboku, İntertoto kuboku və Kuboklar kubokunda təmsil edib. 1997 və 2002-ci illərdə isə ''Kocaelispor'' ölkə kubokunu qazanmağa müvəffəq olub. Amma sonradan eniş dönəmi başladı.

Komanda 2008-də yüksəldiyi elita ilə cəmi 1 il sonra vidalaşmalı oldu və borclar üzündən ildən-ilə geriləməyə başladı. Klubun maddi durumu o qədər bərbad vəziyyətə düşmüşdü ki, ''Kocaelispor'' hətta 2014-cü ildə həvəskarlar liqasına qədər yuvarlandı! Amma fanatlar faktiki olara bu komandanı ''ölməyə'' qoymadılar. Şəhər rəhbərliyinin Kocaelinin digər təmsilçisinə daha çox maraq göstərməyə başlamasının ardından fanatlar birləşərək hər ev oyununda stadionu doldurmağa başladılar.

Həvəskarlar liqasında hər matçını minlərlə azarkeşin önündə keçirən ''yaşıl-qaralar'' nəhayət, 2016-da 3-cü liqaya yüksəldilər. ''Əfsanə Kocaelispor Yaşasın'' kampaniyası və şəhər rəhbərliyinin sayəsində klubun borcları silindi. Komanda 2020-ci ildə 2-ci liqaya, bir il sonra 1-ci liqaya yüksəldi.

Maraqlıdı ki, ''Kocaelispor'' qarşısına elitaya yüksəlmək hədəfi qoyduğu 2021/22-də yenidən 2-ci liqaya yuvarlandı. Amma 1 ildən sonra 1-ci liqaya qayıtmaq mümkün oldu. Bu mövsüm isə Kocaeli təmsilçisi göründüyü kimi 16 illik həsrətə son qoydu.