Türkiyə çempionatında 32-ci tura iki qarşılaşma ilə start verildi.

''Football-plus.az'' xəbər verir ki, ''Konyaspor'' səfərdə 3:2 hesablı əzmkar qələbə qazanaraq ''Hatayspor''u 1-ci liqaya bir qədər də yaxınlaşdırdı. ''Qalatasaray'' isə elitada qalmaq uğrunda çarpışan ''Bodrum''u qəbul etdi.

Debütantın xüsusilə müdafiədə necə təsir bağışlayacağı maraq doğururdu. Çünki komanda məşqçi dəyişikliyindən sonra superliqada keçirdiyi 9 oyunun 8-də qol buraxmamışdı. Amma bu dəfə ''Bodrum'' nə müdafiə, nə də hücum planında qeyri-adi bir şey sərgiləyə bildi. ''Qalatasaray'' mövsümün ən inamlı oyunlarından birini keçirdi və hər hissədə bir qol vuraraq rahat qələbə qazandı. İstanbul nəhəngi bu mövsüm Türkiyə çempionatında rəqibin cərimə meydançasında topla ən çox oynadığı (59), ən çox zərbə (35) vurduğu və ən çox künc zərbəsi (16) yerinə yetirdiyi matçını keçirdi.

Qolları isə aktivinə Lukas Torreyra ilə Devinson Sançes yazdı. ''Beşiktaş''a uduzduqdan sonra ''Qalatasaray'' hələ ki, yoluna inamlı şəkildə davam edir. Son çempion ardıcıl 2-ci qələbə ilə xal fərqini 6-ya yüksəltdi. Amma ''Fənərbaxça'' hələ ki, bu turun oyununu keçirməyib.

Yeri gəlmişkən, saysız-hesabsız rekordların sahibi olan Okan Buruk daha bir göstəricidə adından söz etdirməyi bacarıb. ''Qalatasaray'' bu tur qapısını toxunulmaz saxlamaqla superliqada ardıcıl 5-ci ev oyununda qol buraxmadı. Bu, bir mövsüm üçün klub tarixinin rekordunun təkrarlanması deməkdi.

''Cim-Bom'' daha öncə bunu 40 il əvvəl - 1985-ci ildə almaniyalı Yupp Dervalın başçılığı altında bacarmışdı. Yəni ''sarı-qırmızılar'' 34-cü turda ''Sivasspor''a qarşı ev oyununda da qol buraxmasalar, Okan Buruk bu göstəricidə də yeni rekordun sahibi olacaq.