“Əslində sürpriz də ola bilər” – “Qəbələ” İmişlidə çempion olsa...
“Qəbələ” 1-ci liqanın 22-ci turu çərçivəsində “İmişli”nin qonağı olacaq. “Qırmızı-qaralar” səfərdə qələbə qazansa, çempionluğu təmin edəcək. Ona görə ki, onlar ən yaxın izləyicisi “Karvan”dan 16 xal öndədi, son 5 turda bu fərqin aradan qaldırılması mümkün olmayacaq. İş ondadı ki, “qırmızı-qaralar” heç-heçə etsə də, çempion ola bilər. Lakin bunun üçün Yevlax təmsilçisi MOİK-in meydanında qələbə qazanmamalıdı.
Bununla yanaşı, “İmişli”nin meydanında keçirilən oyunlar qonaqlar üçün heç də asan keçmir. Həm iddialı kollektivə, həm də ciddi azarkeş dəstəyinə malik komanda rəqiblərinə ciddi çətinlik yaşadır. Bəs, “Qəbələ”nin tərəfdarları sevimlilərini belə önəmli matçda necə dəstəkləyəcək? Çempionluq təmin olunsa, bunu məhz rəqibin meydanında böyük təntənə ilə qeyd etmək niyyətləri varmı?
Bu suallarla “qırmızı-qaralar”ın azarkeşlərlə əlaqələndiricisi və “Red Black Army”nin rəhbəri Cavad Şərifliyə müraciət etdik. Onun “Football-plus.az” cavabı:
“İmişlidə həmişə əsl futbol ab-havası yaşanıb. Düzdü, vacib oyundu. Amma məhz çempionluqla bağlı nəsə etməyi planlaşdırmırıq. Təxminən 15-30 nəfər olacağıq. Həmişəki kimi, komandamızı dəstəkləyəcəyik. Böyük ehtimalla, əsas tədbir kubok klubumuza təqdim ediləndə olacaq. Hər halda, sabah gözəçarpan, diqqətçəkən şəkildə dəstək göstərməyə çalışacağıq. Əslində sürpriz də ola bilər. Bu, oyuna neçə nəfərin gəlməsindən və matçda hansı atmosferin hökm sürəcəyindən asılıdı”.
Cavad bəy fanklubla bağlı əsas planların növbəti mövsümdən həyata keçiriləcəyini bildirdi:“Şükür Allaha, premyer-liqaya qayıtdıq. Qarşıdakı aylarda azarkeş qrupunun üzvlərinin sayının artırılması və ev oyunlarında daha maraqlı dəstək formalarının nümayiş etdirilməsi yönündə əlimizdən gələni edəcəyik. Bu yöndə təkliflər hazırlayıb klub rəhbərliyinə təqdim edəcəyik. Düzdü, biz azad azarkeş qrupuyuq. Lakin klub da yardımını bizdən əsirgəmir. Fikirlərimizi bölüşüb, əl-ələ verib növbəti mövsümdən Qəbələ şəhər stadionunun tribunalarını daha rəngarəng etmək niyyətindəyik”.
Xatırladaq ki, “İmişli” – “Qəbələ” matçı saat 16.30-da başlayacaq.KƏNAN BAHADIR
Digər xəbərlər
