“Berezutski ilə bağlı hisslərimiz qarışıqdı” – getməlidi, yoxsa qalmalı?
“Sabah” Misli premyer-liqasının 30-cu turunda “Turan Tovuz”a uduzmaqla qələbəsiz oyunlar seriyasını 8-ə çatdırdı. “Bayquşlar”ın kubok yolu ilə avrokuboklara yollanmaq istəyi heç kimə sirr deyil. Kubokun yarımfinalının ilk oyununda “Neftçi”ni məğlub etməklə şanslarını bir qədər yaxşılaşdırıblar.
Bu heyət və nəticələr fonunda Vasili Berezutsikinin işindən nə dərəcədə razısınız? Kuboku qazansa, onu saxlamağa dəyər, yoxsa göndərilməlidi? Bu sualları “Soldati di Sabah” azarkeş qrupunun rəhbəri Ağaxan Abdullayevə ünvanladıq:
“Berezutski ilə bağlı hisslərimiz qarışıqdı. Bəzən komanda ruhunu göstəririk, meydanda mübarizə var, amma ardıcıllıq çatışmır. Bu heyətlə daha artığını gözləyən azarkeş çoxdu, mən də onlardan biriyəm. Kubok bizim üçün böyük fürsətdi - həm tarix yazmaq, həm də inamı bərpa etmək baxımından. Bu titulu qazandırsa, əlbəttə, qalmaq haqqını qazanır. Amma baş məşqçinin işi təkcə kubokla ölçülməməlidi, oyun fəlsəfəsi, komandaya verdiyi enerji, gənclərlə işi də önəmlidi. Biz nəticədən çox inam görmək istəyirik”.
ƏSƏD SEYİDOV
