Misli premyer-liqasında mövsüm sona yaxınlaşdıqca “Qarabağ”ın hansı turda çempion olacağı maraq doğurur. Axı Ağdam təmsilçisi ən yaxın izləyicisi olan “Zirə”dən nə az, nə çox - 15 xal öndədi və 2024/25 “futbol ili”nin bitməsinə cəmi 6 tur qalıb. Bundan sonra “qartallar”ın “köhlən atlar”a çatması mümkün görünmür.

Bilindiyi kimi, “Qarabağ” hələ 30-cu turda çempionluğunu rəsmiləşdirə bilərdi. Səfərdə “Səbail”i darmadağın edən (4:1) komanda “Zirə” “Neftçi”yə uduzsa, buna nail olacaqdı ki, 4:2 hesablı əzmkar qələbə qazanan qəsəbə təmsilçisi “köhlən atlar”ı sevinməyə qoymadı.

Bəs, ağdamlıların növbəti – 31-ci turda çempion olması mümkündümü?

“Football-plus.az”ın məlumatına görə, “Qarabağ” bu turda Azərbaycan derbisi çərçivəsində “Neftçi”ni qəbul edəcək. Lakin kollektiv bu dəfə də istəyinə çatmaya bilər. Ona görə ki, “köhlən atlar” qalib gəlsə belə, “Zirə” – “Sumqayıt” matçında meydan sahibləri ya uduzmalı, ya da heç-heçə etməlidi. Yalnız belədə birinci və ikinci pillə arasındakı xal fərqi 15-dən çox olacaq ki, son 5 turda fərqi qapamaq mümkün olmayacaq.

Qısası, “Qarabağ” Azərbaycan derbisində qələbə qazansa da, çempionluğu təmin edib-etməməsinə yenə “Zirə” “qərar verəcək”. O başqa məsələ ki, ağdamlılar büdrəsə, əvəzində “qartallar” xal və ya xallar qazansa, məsələ daha da uzanacaq.

Komandaların turnir cədvəlindəki durumu
1. Qarabağ 30 23 4 3 74-18 73
2. Zirə 30 18 4 8 51-25 58

KƏNAN BAHADIR