Canluici Buffon A seriyasının 31-ci turunun “Roma” – “Yuventus” oynundan (1:1) sonra DAZN platformasına müsahibə verib.

İtaliya yığmalarının 47 yaşlı idman direktoru olan dünya şöhrətli sabiq qapıçı əsasən 19 il formasını daşıdığı “Yuventus”la bağlı sualları cavablayıb.

Gənclər...
Mövsümün əvvəli ilə müqayisədə indi “Yuventus”un formasında meydana çıxan gənc futbolçular arasındakı anlaşma daha yaxşıdı. Bu, bütün oyunçuların bir istiqamətdə hərəkət etməsi nəticəsində mümkün olub. Onlar üçün bir neçə ay əvvəl start heyətində oynamaq daha çətin idi. Gənclər onda sanki komanda ilə bağlı öz təsəvvürlərinə malik idilər.

...Svilar...
Svilar həqiqətən də istedadlı qapıçıdı. O, “Roma”nın formasında inanılmaz işlər görür, bu oyunda bacarıqlarını bir daha nümayiş etdirdi. Ümumiyyətlə, mövsümü sabit keçirir. Hə, bir də ki, o, qaynanasını sevən yeganə adamdı!

...Ken ilə Facoli...
Kenə hansı məsləhəti verərdim? Onu xoşbəxt edən işi görməli olduğunu deyərdim. Elə futbolçular var ki, bacarıqlarını göstərmələri üçün müəyyən şərtlərin yerinə yetirilməsinə ehtiyac duyurlar. Görünür, Moyze belə şəraiti “Fiorentina”da tapıb. “Yuventus”dan çıxan Facoliyə gəlincə, klubun yetirməsi üçün elə bir məqam gəlir ki, artıq özünə “gənc və perspektivli” oyunçu gözü ilə baxılmasını istəmir. O, özünü əsas oyunçulardan biri kimi hiss etmək istəyir. Ona Ken kimi əlverişli şərait lazım idi. İndi onlar özlərini əsas heyətin üzvü sayırlar, çünki startda yerləri təmin olunub. Ken ilə Facolinin klubunu dəyişməklə doğru etdiklərini düşünürəm. Amma bu məqamda “Yuventus”un onlardan nə dərəcədə yararlandığı barədə məsələ qaldırmaq istəmirəm.

...Lokatelli...
Loka (“Yuventus”un yarımmüdafiəçisinə tərəf yönəlir), sən indi komandanın kapitanısan. Bu, çox vacib məqamdı. Sənin bir dəfə mənə necə baxımlı qol vurduğunu xatırlayıram. Onda meydanboyu etdiyin hərəkətləri çox bəyənmişdim. Fikrimcə, kapitan kimi oynamağın komandaya faydalı olacaq.

...kapitan sarğısı...
Ümumiyyətlə, kapitan sarğısını tez-tez dəyişmək xüsusilə “Yuventus” kimi klub üçün tipik hal deyil. Komandanın paltardəyişmə otağında yüz il ərzində kapitanlıq etmiş bütün oyunçuların fotoları asılıb. Bu tarixdi. Gərək ilk növbədə yenicə sıralarına qoşulduğun klubun tarixini öyrənəsən. Belə məsələlər adamı kapitanın xüsusi fiqur olduğunu düşünməyə vadar edir. Çətin məqamlarda komandanı arxasınca yalnız o daşımalı və məşqçinin ideyalarını oyundaşlarına çatdırmalıdı. Zəif adam kapitan ola bilməz.

...Tudor...
Fikrimcə, o, baş məşqçi vəzifəsinə yenicə təyin olunsa da, artıq enerjisi ilə komandaya fayda verir. “Yuve”nin oyunçuları mövsümün əvvəlindən məhz belə enerjiyə ehtiyac duyurdular.

...Tyaqo Motta...
Tyaqo mənim ən böyük ümidim idi və indi də belə qalır. “Yuventus”da işlər istənilən səviyyədə getməyibsə, bu, onun ideyalarından əl çəkməli olduğu anlamına gəlmir. Fikrimcə, bu “məğlubiyyət” onun bundan sonrakı fəaliyyəti üçün faydalı ola bilər. Mən əvvəlki kimi onun məşqçi bacarığına inanıram.

...Qasperini...
Bir neçə dəfə “Atalanta”ya keçməyə yaxın olmuşam. Xüsusilə karyeramın son iki ilində Qasperini ilə çox ünsiyyət saxlamışıq. Bir dəfə, demək olar ki, onun komadasında qərar tutmuşdum, amma müqavilə son anda alınmadı. Klubun bu mövsüm təcrübəli mütəxəssisin tələblərini tam şəkildə yerinə yetirə bilmədiyini hesab edirəm. O, arabir nəyin niyə alınmadığını deyir. Amma budəfəki iradları futbol ictimaiyyətində daha böyük əks-səda doğurdu. Adətən Can Pyeronun narazılıqlarına doğru reaksiya verilirdi, ancaq bu dəfə belə olmadı.

...və ÇL-ə vəsiqələr haqda
Fikrimcə, “Yuve” qarşıya qoyulan vəzifəni yerinə yetirəcək. Çempionlar Liqasına daha hansı komandalar çıxa biləcək? İndiki vəziyyətə əsasən, “Bolonya”nın adını çəkərdim. Bu isə o deməkdi ki, hansısa nəhəng komandalar mövsümü ilk “4-lük”də başa vura bilməyəcəklər.