Corco Kyellini çoxdan Los Ancelesdə yaşayır.

“Football-plus.az” xəbər verir ki, İtaliya yığmasının sabiq müdafiəçisi bugünlərdə vətənində olub. Bu mövsüm “Los Anceles”in formasında MLS-də meydana çıxdığı 14 oyuna 1 qol vuran Avropa çempionu jurnalistlərin aktual suallarını cavablayıb. Roberto Mançininin milli komandadan istefa verməsi ona çox pis təsir edib.

- Bu xəbəri necə qarşıladın?
- Çox təəccübləndim. Fikrimcə, Mançio indi motivasiyasını itirdiyi üçün belə qərar verib. Onun istefasının əsl səbəbini öyrənmək üçün müəyyən qədər vaxt lazım gələcək. Ona “skuadra adzurra”dakı fəaliyyətinə görə təşəkkürümü məktub vasitəsilə bildirmişəm. Düzünü desəm, milli komandaya yenicə təyinat alanda onun tanındığı kimi olduğunu bilmirdim. Biz birlikdə çox emosiyalar yaşamışıq. Həmin hissləri ürəyimdə saxlayıram.

- İtaliya yığmasının necə Avropa çempionu olduğunu yaxşı xatırlayırıq... Sonra isə faciə baş verdi...
- İki il əvvəl komanda kimi formamızın zirvəsinə çatdıq. Az sonra isə dünya çempionatının ilk seçmə matçlarında yersiz xallar itirdik. Hələ də zirvədə olmağımızla bağlı illüziya vardı. Lakin Şimali Makedoniya ilə pley-off oyunu bunun belə olmadığını əyani göstərdi: həmin matçdan sonra dünya sözün hərfi mənasında ətrafımızda çökdü. Açıq danışaq: bəzi məqamlarda bəxtimiz də gətirmədi. Halbuki Avropa çempionatında bəxt də bizim tərəfdə olmuşdu.

- İndi milli komandada Buffon peyda olub...
- O, yığmaya çox şey verə bilər. Cici başqalarından çox fərqlənir, o, yığmaya görə səmimi qəlbdən narahatlıq keçirir.

- Amma sənin yaxın dostun Bonuççinin işləri heç də qaydasında deyil.
- Onun düşdüyü vəziyyətə görə təəssüflənirəm. Leonardo “Yuventus” ilə başqa cür vidalaşmağa layiq idi. Və mən klubun bu baxımdan onunla razılğa gələcəyinə ümid edirəm. Amma “Yuve” “Yuve”di, bu klub qərarlarını özü verir...

- Bonuççi ilə ünsiyyət saxlamısan?
- Onunla iyulun ortalarında Toskanada görüşmüşdük. Leonun mənim məsləhətlərimə ehtiyac duyduğunu düşünmürəm.

- Yeni “Yuventus” sənə necə görünür?
- Komandanın yüksək xətlə hücum qurmaq istədiyini görürəm. Fikrimcə, oyunçuların yenidən istəkli olması Alleqri üçün vacibdi. Bunun üçün mövsümə əla başlamaq lazım idi.

- Komanda bu mövsüm skudettonu qazana bilər?
- “Yuve” həmişə bu hədəfə can atmalıdı. Həm də nəzərə alaq ki, komanda cari mövsümdə avrokuboklarda iştirak etməyəcək. Bu, ciddi üstünlükdü. Amma çempionluq uğrunda mübarizədə əsas favoritlərin “Napoli” və “İnter” olduğunu düşünürəm. Bu komandalardan sonra “Yuve” gəlir, sonra isə özünün intriqa yaradan layihəsi ilə “Milan”ı görürəm. Daha sonra “Latsio” ilə “Roma” gəlir. Hələ “Atalanta”nı da diqqətdə saxlamaq lazımdı. “Yuventus”un mövsüm ərzindəki çıxışı böyük ölçüdə Vlahoviçlə Kyezadan asılı olacaq...

- Vlahoviçlə Lukakunun dəyişdirilməsi ideyasına necə baxırsan?
- Klub bu mübadiləyə yalnız iqtisadi səbəbdən gedə bilərdi. Bu, yalnız texniki məsələ olsaydı, heç kim bu ideyaya gözucu belə baxmazdı.

- Bremerin müdafiə “üçlüy”ünə layiq olduğunu hesab edirsən?
- İmkan tapsaydım, ona şəxsən çox güclü olduğunu deyərdim. “Yuve”dəki ilk mövsümü qənaətbəxş alındı. Məncə, Bremer bundan sonra daha da inkişaf edəcək.

- Bu mövsüm Messiyə qarşı oynamaq şansın olacaq...
- Ona qarşı tezliklə oynayacağam (gülür). Leonun gəlişi MLS üçün əsl sensasiya oldu.

- O, ABŞ-dadı, Kriştiano Ronaldo isə Səudiyyə Ərəbistanında çıxış edir.
- Onlar həmişə uduşlu olan iki fenomendi. Səudiyyə Ərəbistanının köpük olduğunu düşünmürəm...

- Bəs sən?
- Dekabra qədər oynayacağam, sonra isə futbolda rəhbər olmaq istəyəcəyəm.

- “Yuve”yə qayıdan qardaşın Klaudio kimi?
- Bunu gözləmirdim, o, indi çox xoşbəxtdi. Çünki “Yuve” bizim üçün evdi.