Məlum olduğu kimi ''Beşiktaş'' mövsümə Covanni van Bronkhorstun başçılığı altında başlamışdı. Komanda avqustda ölkə superkuboku uğrunda oyunda ''Qalatasaray'' üzərində 5:0-lıq tarixi qələbə qazanaraq fanatlarını bir xeyli ümidləndirmişdi.

Ancaq sonradan uğursuz və qeyri-sabit nəticələr bir-birini əvəz edincə niderlandlı mütəxəssislə hələ ilk dövrənin gedişində yollar ayrıldı. Onun klubdakı dönəmi cəmi 4 ay çəkdi. Bu müddətdə ''Qartal'' 20 rəsmi oyundan 10 qələbə, 4 heç-heçə, 6 məğlubiyyətlə ayrıldı ki, bu da orta hesabla hər oyuna 1,70 xal deməkdi. Bu arada ''Sabah'' nəşrinin iddiasına görə Van Bronkhorsta hələ də heç bir təzminat ödənilməyib. Tərəflər yollarını ayırarkən İstanbul nəhəngi 3,4 milyon avroluq təzminat yükünü üzərinə götürmüşdü. Amma indiyə qədər 50 yaşlı məşqçiyə qara qəpik də ödənilməyib. Mənbənin iddiasına görə Van Bronkhors Sərdar Adalının başçılıq etdiyi klubun indiki rəhbərliyinə mövsümün sonuna qədər vaxt verib. Həmin müddətə qədər təzminatın heç olmasa bir hissəsi ödənilməsə, təcrübəli mütəxəssis məsələni UEFA-ya daşıyacaq. Belə olacağı təqdirdə ''Beşiktaş''ın durumu daha da qəlizləşə bilər.

UEFA Van Bronkhorstun lehinə qərar versə, o zaman təzminat ən azı 5-6 milyon avroya yüksələcək.