“Beşiktaş”da gözlənilən ayrılıq, nəhayət, baş tutdu.

İstanbul nəhəngində Covanni van Bronhkorst dönəmi rəsmən başa çatdı. Başqan Hasan Aratın istefasından sonra onun vəzifəsinə keçən Hüseyn Yücəl niderlandlı mütəxəssisi və onun köməkçilərini istefaya göndərdi. Beləliklə, iyunun 14-də başlayan bu işbirliyi cəmi 169 gün davam etdi. Halbuki superkubokda “Qalatasaray” üzərindəki 5:0-lıq tarixi qələbədən və ilk 3 turda qazanılan maksimum nəticədən sonra camiədə bir çoxları çempionluqdan dəm vururdu. “Beşiktaş” Van Bronkhorstun başçılığı altında 12-si superliqa, 7-si avrokubok, 1-i ölkə superkubokunda olmaqla keçirdiyi 20 rəsmi oyundan 10 qələbə, 4 heç-heçə, 6 məğlubiyyətlə ayrılmış oldu. 49 yaşlı mütəxəssisin “Beşiktaş”la 2026-ya qədər müqaviləsi var idi. Onun illik maaşı 1,4 milyon avro idi və indiyə qədər klubdan təxminən 600 min avro almışdı. Türkiyə mətbuatının iddiasına görə, köməkçiləri ilə birlikdə Van Bronkhorsta 3 milyon avro təzminat ödəniləcək.

İndi camiədə hər kəsi yeni məşqçinin kimliyi maraqlandırır. Əsas namizəd Sərgən Yalçın sayılırdı. Həm rəhbərlik, həm də fanatlar növbəti tur komandanın “Fənərbaxça” ilə derbiyə Sərgənin başçılığı altında çıxmasını istəyirdi. Amma Hüseyn Yücəllə təcrübəli məşqçi arasındakı ilk görüşdə razılıq əldə olunmadı. Həm futbolçu kimi klubun əfsanəsi sayılan, həm də məşqçi kimi 2020/21-də “Beşiktaş”ı çempion edən Yalçın camiədə çox sevilir. Amma o, bu şərtlər altında işləmək istəmədiyini, bu xaosun içində uğur qazana bilməyəcəyini açıq-aşkar etiraf etdi. “Ekol TV”yə geniş açıqlamalar verən Yalçın bu mövzunun onun üçün qapandığını və ən azı mövsümün sonuna qədər “Beşiktaş”dan heç kimlə görüşməyəcəyini vurğuladı.

Sərgəni anlamaq olar. Çünki yayda camiədə yenidən prezident seçkisi olacaq. Yeni prezident gələcəyi təqdirdə isə Sərgənlə yollar ayrıla bilər. Ən son xəbərlərdə Hüseyn Yücəlin Samet Aybaba və İbrahim Üzülməz ilə görüşdüyü qeyd olunub. Aybaba cari mövsümə “Beşiktaş”da baş əlaqələndirici kimi başlamış və bir neçə gün öncə istefa vermişdi. Amma onun şərti var. Aybaba baş məşqçi postuna gəlmək üçün transferlərə cavabdeh yönətici Kaan Şakulun istefaya göndərilməsini tələb edir. Ona görə də hələ ki əsas namizəd İbrahim Üzülməzdi. “Beşiktaş”da futbolçu kimi 11 il top qovan, 5 il kapitan sarğısını daşıyan və yüzillik yubileydə çempionluq qazanan Üzülməz ilə bu gün son detallar müzakirə ediləcək.