''Fənərbaxça''lı futbolçudan fanatlara xeyirxah jest
''Fənərbaxça''nın fransalı ulduzu Alan Sen-Maksimen son hərəkəti ilə fanatların könlünü fəth edib.
Müqavilə ilə ''Əl-Əhli''yə məxsus olan və İstanbul nəhəngində icarə əsasında oynayan 28 yaşlı vinger cümə günü ''Ülkər'' stadionunda yerləşən ''Fenerium'' dükanını ziyarət edib. Klub atributlarının satıldığı bu dükanda Sen-Maksimen fanatlarla görüşərək onlarla hem şəkil çəkdirib, həm də imza paylayıb. Ancaq klubdan bu ziyarətlə bağlı verilən açıqlamada daha bir məqam diqqəti cəlb edib.
Belə ki, təcrübəli futbolçu həm də fanatlara jest edərək onların həmin dükandan aldıqları bütün atributların pulunu ödəyib! Bu jesti ilə alqış qazanan Sen-Maksimen bunları deyib:
''Fanatlar mənə çox dəstək verir. Onları sevirəm. Klubun dükanında bu qədər insanın olduğunu görmək məni sevindirdi. Hərənin bir cür həyatı var. Hər kəsin mənim qədər şanslı olmadığını bilirəm. Mən hər zaman qazandığımı bir az geri verməyə, sevgimi göstərməyə çalışıram. Burda da uşaqlar və onların qəlbləri üçün yaddaqalan bir şey etmək istədim. Hamımız birlikdə bu günün keyfini çıxaraq''.
Qeyd edək ki, Sen-Maksimen ''Fənər'' tarixinin ən bahalı icarə futbolçusudu. Klub mövsümün əvvəlində onun birillik icarəsinə 8 milyon avro ödəyib.
Sen-Maksimenin bir ara Joze Mourinyo ilə ulduzu barışmırdı. Hətta portuqaliyalı mütəxəssis onu qeyri-peşəkarlıqda günahlandıraraq bəzi matçlarda iştirak ərizəsinə salmamışdı. Amma son oyunlarda onlar arasında buzlar əriyib və futbolçu yenidən şans qazanmağa başlayıb.
''Trabzonspor''la matçda Sen-Maksimen hətta uzun fasilədən sonra ilk dəfə aktivinə məhsuldar ötürmə yazdı.
Digər xəbərlər
