''Fənərbaxça''nın baş məşqçisi Joze Mourinyo son hərəkəti ilə böyük alqış qazanıb.

''Football-plus.az'' xəbər verir ki, dünyaca ünlü portuqaliyalı mütəxəssis dünən ''Acıbadəm Altunizadə Xəstəxanası''nda onkoloji xəstə uşaqları ziyarət edərək onları ruhlandırmağa çalışıb.

Klubdan verilən açıqlamada qeyd olunub ki, ziyarətdə ''Fənər''in idarə heyətinin üzvü Ərən Dişli də iştirak edib. Mourinyo həm xəstəxananın direktor müavini Zeynəb Aydınlar Eröğüt, həm də pediatr-onkoloqu Cengiz Hanpolat ilə söhbət edib. Eyni zamanda uşaqlar və onların ailə üzvləri ilə söhbət edən, ruhlandırmağa çalışan Mourinyo uşaqlara hədiyyələr verib və onlarla şəkillər çəkdirib. 62 yaşlı çalışdırıcı uşaqlara ''Fənərbaxça''nın imzalı formalarını da paylayıb.

Ziyarətin daha bir yaddaqalan anı həmin gün ad gününü qeyd edən Yusuf adlı uşağın anası ilə birlikdə hördüyü şərfi Mourinyoya hədiyyə etməsi olub. Bundan başqa Yusuf ''Fənər''in üzvləri Mərt Hakan Yandaş və İrfan Can Kahveci üçün hördüyü şərfləri də klubun mətbuat katibi Alpər Yemenicilər vasitəsilə onlara çatdırıb.

Hər iki futbolçu şərflərlə birlikdə şəkil çəkdiriblər və daha sonra Yusufa zəng vuraraq təşəkkürlərini bildiriblər. Ziyarətdə iştirak edən ''Fənərbaxça''nın basketbol komandasının maskotu ''Yellow''da rəngli görüntülərə səbəb olaraq uşaqların böyük marağı ilə üzləşib.

ƏLİ