''Bu turnir özünü göstərə bilməyən klublar üçün əla fürsət və bənzərsiz platformadı. FİFA-nın turnirləri hər zaman futbolçuya əlavə motivasiya verir. Bu cür turnirdə ''Monterrey''i təmsil etmək bizim üçün böyük bir həyəcan olacaq. İstəkli şəkildə turnirə hazırlaşırıq və yaxşı performans sərgiləyəcəyimizə inanırıq. Turnirin ABŞ-da keçirilməsi ağıllı bir qərardı. Amerikada insanların futbol coşqusu, sevgisi daha da artır. Düzdü, Avropada futbol ənənələri daha güclüdü. ABŞ-da insanların böyük əksəriyyəti Amerika futbolu və ya MBA-ya daha çox maraq göstərir. Futbol burda ön planda deyil. Amma bu cür addımlar sözsüz ki, futbola da marağı artıracaq. Los Ancelesdə Meksika əsilli insanların çox olduğunu bilirəm. Təbii ki, onlardan böyük dəstək gözləyəcəyik. Səfərdə özümüzü evdəki kimi hiss etmək önəmlidi. Bu turnirdə çempion olmaq bizim üçün yuxunun reallaşmasına bərabər olar. Artıq FİFA prezidenti Canni İnfantino ilə ABŞ prezidenti Donald Tramp birlikdə turnirin təqdimat mərasimini keçiriblər. Əslində məni Meksikaya gəlməyə vadar edən motivasiyalardan biri də məhz bu idi. Yeni turnirdə oynamaq fürsəti əldə etmək istəyirdim. Mən hər zaman iddialı və pozitiv düşünməyi sevirəm. Ona görə də bu turnirin qalibi olmaq istərdim. Komanda yoldaşlarım da bu hədəflə oyunlara çıxacaqlar''.