Bu mövsüm artıq 4 məşqçinin başçılığı altında oyunlara çıxan ''Trabzonspor''da nəticələr heç cür düzəlmir.

''Football-plus.az'' xəbər verir ki, qaradənizlilər 2024/25-də 28 superliqa matçından 9 qələbə, 9 heç-heçə, 10 məğlubiyyətlə ayrılaraq 36 xal toplayıblar ki, bu da hər oyuna orta hesabla 1,28 xal deməkdi.

Komanda hazırda lider ''Qalatasaray''dan 35 xal geridə olmaqla 11-ci pillədə qərarlaşıb və düşmə zonasından cəmi 5 xal öndədi. Komanda mövsümə ''Sivasspor''la heç-heçə etməklə başlamış və avrokuboklardakı uğursuz nəticələrin də təsiri ilə 1-ci turdan sonra Abdulla Avcı ilə yollarını ayırmışdı.

2-ci turda ''Eyüpspor''la oyuna müvəqqəti olaraq İhsan Dərəlioğlunun başçılığı altında çıxan və o oyundan da heç-heçə ilə ayrılan ''Trabzonspor'' daha sonra Şenol Günəş ilə anlaşdı. Komanda öz əfsanəsinin başçılığı altında 23 superliqa matçından 8 qələbə, 6 heç-heçə, 9 məğlubiyyətlə ayrılaraq cəmi 30 xal topladı və ümidlər yenə doğrulmadı.

''Hatayspor''a evdəki şok məğlubiyyətin ardından Günəş istefaya göndərildi və onu Fatih Təkkə əvəzlədi. Başlanğıc çox uğurlu alındı və ''Trabzonspor'' bu məşqçi ilə debüt oyunundaca səfər sindromuna son qoyaraq ''İstanbul BŞ''ni 3 cavabsız qolla məğlub etdi. Amma davamı gəlmədi. Ev oyununda ''Göztəpə'' ilə 1:1 bərabərə qalan ''bordo-mavililər'' son olaraq səfərdə ''Fənərbaxça''ya 1:4 məğlub oldular. Yəni Təkkə ilə 3 oyuna yalnız 4 xal toplamaq mümkün olub.

28 oyuna 36 xal komandanın son 12 ildəki ən zəif göstəricisidi! ''Trabzonspor'' sonuncu dəfə 2012/13-ü bundan daha bərbad keçirib. Həmin vaxt komanda 28-ci turu 34 xalla 12-ci pillədə tamamlamışdı.