Novruz Əzimovun adı protokoldadı, amma stadionda olmayıb
"Difai" futbol üzrə ölkə çempionatının 19-cu tur matçında MOİK-in meydanından qalib ayrıldı - 3:1.
Maraqlıdı ki, bu oyunun PFL-in saytında yerləşdirilən protokolunda qonaqların baş məşqçisi kimi ilk dəfə Novruz Əzimovun adı göstərildi. Belədə mütəxəssislə əlaqə saxlayıb komandanı meydana çıxardığı birinci matçda qələbə qazanması ilə bağlı təəssüratını öyrənmək istədik. Lakin ondan qəribə cavab eşitdik:
"Kim deyir ki, komandanı mən meydana çıxarmışam? Məni stadionda kim görüb? Bəli, yaxın dostumun xahişiylə adımın komandanın baş məşqçisi kimi qeyd edilməsinə razı olmuşam. "Difai" qələbə qazanıbsa, bu, prezident Asəf Məlikovun, məşqçilər korpusunun və futbolçuların uğurudu. Sadəcə, "Difai" adının mənşəyini, tariximizdə tutduğu yerin nə qədər vacib olduğunu bildiyim üçün bu təklifi qəbul etdim".
Bəs komandanı meydana çıxarmayan şəxsin adının protokolda baş məşqçi kimi qeyd edilməsi nə dərəcədə düzgündü? Ümumiyyətlə, bu, hüquqi cəhətdən doğrudumu? PFL-in Media və marketinq direktoru Sənan Abdullayevin qəzetimizə verdiyi məlumata görə, burda hansısa qayda pozuntusu yoxdu. Qalan məsələlər isə klubla həmin şəxs arasında həll olunmalıdı.
KƏNAN BAHADIR
Digər xəbərlər
