Novruz Əzimov yenidən iş başında! Bölgə klubu ona əmanət
Futbol üzrə ölkə çempionatının 1-ci liqasında yarışan “Difai”nin baş məşqçisi Xaqani Məmmədovla yolları ayırdığını xəbər vermişdik. Ağsulular sabah 14-cü tur çərçivəsində “Zaqatala”nın qonağı olacaq.
Görəsən, həmin oyuna komanda kimin rəhbərliyi altında çıxacaq? Bu sualı “Difai”nin prezidenti Asəf Məlilova ünvanladıq:
“Növbəti oyuna komandanı baş məşqçinin köməkçisi Aydın Qasımov çıxaracaq. Komandamızın baş məşqçisi də Novruz Əzimov olacaq. Qarşılıqlı razılıq əsasında Xaqani Məmmədovla yolları ayırdıq. Nəticələrdən narazı olduğumuzu deməzdim. Biz gedən insanın arxasınca danışmırıq. Nə bizim ondan, nə də onun bizdən narazılığı var”.
Komanda ev oyunlarını nə vaxt Ağsu şəhər stadionunda keçirəcək? Asəf bəy bu sualı da cavabladı:
“Bu sualı azarkeşlərimiz də bizə çox ünvanlayır. Biz məmnuniyyətlə getməyə hazırıq. Orda təhvil-təslim işlərində problem yaranıb. Müdaxilə edə bilmirik. UEFA nöqsanlar aşkar etdiyinə görə hələlik oynamağa icazə verilmir. Bu məsələnin AFFA ilə bağlı olduğunu deməzdim. Problem təhvil-təslim işlərindədi”.
Qeyd edək ki, 13 turdan sonra 9 xal toplayan “Difai” hazırda turnir cədvəlinin 9-cu pilləsində qərarlaşıb.
ƏSƏD SEYİDOV
Digər xəbərlər
