Azər Bağırovun car çəkdiyi problem nədi? – “Kəpəz”in icraçı direktoru belə dedi
“Kəpəz”in baş məşqçisi Azər Bağırov mətbuat konfranslarında verdiyi açıqlamalarla diqqəti çəkir.
Mütəxəssis, demək olar ki, hər dəfə komandada hansısa problemin olduğuna eyham vursa da, açıq-aşkar nədən bəhs etdiyini demir. Görəsən, Azər bəyi narahat edən nədi? Baş məşqçi bu barədə klub rəhbərliyiylə danışıbmı?
Bu sualları “Kəpəz”in icraçı direktoru Cabir İbrahimova ünvanladıq. Onun “Football-plus.az”a cavabı:
“Biz rəhbərlik olaraq, baş məşqçimiz Azər Bağırovla müntəzəm görüşür, müəyyən məsələləri müzakirə edirik. Fərqli istiqamətlərdə fikir mübadiləsi aparırıq. Klubun, komandanın daxilində olanlar elə daxildə də qalmalıdı. Bu, ailənin içində başverənlərdi. Hər klubda belədi. Diqqətimiz növbəti oyunlara yönəlib. Tərəfimizdən komandanın yaxşılığı üçün nə lazımdısa, həmin yöndə işlər görülür”.
Göründüyü kimi, klub rəhbərliyi də məsələni mətbuata açıqlamaq istəmədi...
Yeri gəlmişkən, “Kəpəz”in sponsor tapması haqda xəbəri elan etməsindən iki aya yaxın vaxt ötsə də, hələ daha ətraflı bilgi verilməyib.
Görəsən, Azər Bağırovun nigaranlığının, klub rəhbərliyinin üstüörtülü açıqlamasının, mətbuatda yayda kollektivin əcnəbi baş məşqçiyə tapşırılacağı haqda yayılan məlumatların bir-biriylə bağlılığı varmı?
KƏNAN BAHADIR
Digər xəbərlər
