Türkiyə Futbol Federasiyasının nəzdində fəaliyyət göstərən Nizam-İntizam Komitəsi həftəiçi ölkə kubokunun 1/4 final mərhələsi çərçivəsində baş tutan qalmaqallı ''Fənərbaxça'' - ''Qalatasaray'' derbisi (1:2) ilə bağlı sövqləri açıqlayıb.

Xatırladaq ki, matçın sonlarına yaxın iki klubun ehtiyat zonası arasında dava-dalaş düşmüşdü. ''Fənər''dən Fred ilə Mərt Hakan Yandaş, ''Qalatasaray''dan Kərəm Dəmirbay ilə Barış Alpər Yılmaz qırmızı vərəqə almışdı. Əsas qalmaqal isə Joze Mourinyo ilə Okan Buruk arasında yaşanmışdı. Portuqaliyalı mütəxəssis həmkarının burnunu sıxmış və bu hərəkətinə görə qırmızı vərəqə almışdı.

Beləliklə, cəzalar bəlli olub. ''Fənərbaxça''nın artıq sabah ''Trabzonspor''a qarşı oyunu var. ''Qalatasaray''ın isə bu tur oyunu yoxdu. ''Fənər'' NİK tərəfindən cəzaların daha tez açıqlanmasını tələb edib.

Maraqlıdı ki, Mourinyo ''rəqibə fiziki xəsarət yetirmək'' maddəsi ilə sövq edildiyi üçün ona 5-10 oyun arası cəza veriləcəyi güman edilirdi. Hər halda Türkiyə mətbuatı məhz bunu iddia edirdi. Amma portuqaliyalı mütəxəssis yalnız 3 oyunluq cəza alıb. Üstəlik onun cəzası superliqa oyunlarına şamil edilməyəcək.

Eyni cəza Fredə də verilib. ''Sambaçı'' da 3 oyunluq cəzasını gələn mövsüm kubokda çəkəcək. Mərt Hakan Yandaşa 1 oyunluq cəza verilib. Mourinyonun köməkçiləri - Salvatore Foti ilə Sandro Zufiç də cəzadan qurtula bilməyib. Zufiç qapıçılar üzrə məşqçidisə, Foti Mourinyonun əsas köməkçisidi. Onların hər ikisinə 4 oyunluq cəza verilib. Mourinyonun cəzası yalnız kubok oyunlarına aid edildiyi üçün o, sabah ''Trabzonspor''la oyunda komandanın başında yer alacaq.

''Qalatasaray''lı isimlərin cəzaları isə daha sonra açıqlanacaq.