Müqavilə ilə ''Barselona''ya məxsus olan və hazırda icarə əsasında ''Betis''də çıxış edən Viktor Roke son açıqlaması ilə diqqət çəkib.

19 yaşlı braziliyalı hücumçu kumirinin Kriştiano Ronaldo olduğunu etiraf edib. Portuqaliyalı superulduz bilindiyi kimi ''Barsa''nın əzəli rəqibi ''Real''ın əfsanəsi hesab olunur. Roke bunları deyib: ''Kriştiano Ronaldo mənim kumirimdi. Düzdü, Neymarı da çox bəyənirəm. Onun meydanda xüsusi sehri olur. Amma kumirim yalnız Ronaldodu. ''Barselona''da ilk aylar mənə çox çətin oldu. Çünki İspaniyaya yollanacağımı yalnız transferdən bir həftə öncə öyrəndim. Adaptasiya üçün zamanım olmadı. Ancaq bunun özü də bir təcrübədi.

''Barselona''nın üzvü olduğum üçün xoşbəxtəm''. Qeyd edək ki, vətənində ''Palmeyras'' və Paranaense ''Atletiko''sunun şərəfini qorumuş gənc ''sambaçı'' 2023-ün yayında 30 milyon avroya ''Barsa''ya transfer olundu. Amma ümidləri doğrultmayan və 16 rəsmi oyuna cəmi 2 qol vuran Roke bu mövsüm icarə əsasında çıxış etdiyi ''Betis''də artıq indidən 14 oyuna 5 qol vurub. ''Betis''in onu gələn yay 25 milyon avroya daimi əsasda transfer etmək hüququ var.

ƏLİ