Braziliya yığmasında yeni baş məşqçi axtarışları növbəti dəfə sürətləndirilib.

''Football-plus.az'' xəbər verir ki, Braziliyanın DÇ-2026-nın seçmə mərhələsində əzəli rəqib Argentina önündə 1:4 hesabı ilə darmadağın olması ölkədə şok effekti verib.

2014-ün yanvarından baş məşqçi vəzifəsini icra edən Dorival Juniiorun işindən razı olanların sayı onsuz da çox deyildi. Son məğlubiyyət isə Braziliya Futbol Konfederasiyasını (BFK) vaxt itirmədən yeni məşqçi axtarışlarına başlamağa vadar edib. Axı mundialın startına 1 ildən bir qədər artıq vaxt qalıb.

Karlo Ançelotti hələ də əsas namizəddi. BFK hələ ötən mövsümdən tanınmış italiyalı mütəxəssisin arxasınca düşüb. Xüsusilə qurumun prezidenti Ednaldo Rodriges Ançelottinin tərəfdarıdı.

Bu arada Ançelottinin alternativinin də adı məlum olub. Bu, Jorje Jezuşdu. BFK-da təcrübəli mütəxəssisin namizədliyini dəstəkləyənlər var. Onların fikrincə, Jezuş Braziliyada çalışdığından ölkənin futbol mühitinə yaxşı bələddi. Hazırda Səudiyyə Ərəbistanı təmsilçisi ''Əl-Hilal''ı çalışdıran 70 yaşlı Jezuş 2019/20-ni ''Flamenqo''da keçirmiş və bir mövsümə bu klubda 5 titul qazanmışdı. Bu üzdən o, Braziliyada həm sevilir, həm də böyük nüfuza malikdi. Özü də Jezuşun ''Əl-Hilal'' ilə müqaviləsinin müddəti bu yay, daha dəqiq desək, Klublararası Dünya Çempionatından sonra başa çatacaq. Tərəflər arasında artıq ilkin danışıqlar da baş tutub.

Qeyd edək ki, Braziliya Cənubi Amerika zonası üzrə seçmə mərhələdə 14 oyuna topladığı 21 xalla 4-cü pillədədi. Lider Argentina artıq mundiala vəsiqəni təmin edib.