Çoxdan gözlənilən qərar verilib: Fernando Diniz Braziliya millisinin baş məşqçi vəzifəsindən azad olunub.

"Football-plus.az" xəbər verir ki, onunla bağlı qərarı Braziliya Futbol Konfederasiyasının prezidenti Ednaldo Rodriges verib. Qeyd edək ki, Diniz son aylar həm də “Fluminense”nin baş məşqçisi idi. O, yığmanı ötən ilin iyulundan müvəqqəti çalışdırırdı. Milli komanda ötən müddətdə 49 yaşlı mütəxəssisin rəhbərliyi altında 6 oyun keçirib. Bu oyunların hamısı DÇ-2026-nın seçmə mərhələsi çərçivəsində baş tutub. Braziliya bu matçlarda iki dəfə qalib gəlib, bir dəfə heç-heçə edib, üç oyunda isə məğlub olub.

Artıq Dinizin xələfi müəyyənləşib. Komandanı bundan sonra Dorival Junior çalışdıracaq. O, artıq “San Paulu”nun baş məşqçi vəzifəsini tərk edib. 61 yaşlı mütəxəssis ötən il bir neçə ay ərzində çalışdırdığı bu klubla Braziliya kubokunu qazanıb. Onun 2022-ci ildə “Flamenqo”nu bu turnirdə və Libertadores Kubokunda qələbəyə daşıdığını da xatırladaq.