“Çünki bütün futbolçular eyni səviyyədə çıxış edir” – yığmada niyə lider yoxdu?
Haiti və Belarus yığmalarından iki oyunda beş qol buraxan milli komandamızın heyətində yenə də liderlik xüsusiyyətlərinə malik futbolçu görünmədi.
Ramil Şeydayevlə məlum penalti epizoduna görə gözdən düşən Emin Mahmudov yığma tarixinin son lideri (hərçənd bu da mübahisəlidi) idi. Halbuki bu yığmanın Nazim Süleymanov, Yunis Hüseynov, Tərlan Əhmədov, Qurban Qurbanov, Rəşad Sadıqov kimi liderləri olub. Görünən odu ki, indiki heyətdə belə futbolçu yoxdu.
Biz bununla bağlı Yunis Hüseynovun fikrini öyrəndik:
“Yığmada həmişə lider futbolçular olub. Bu rolu, adətən, kapitanlar üzərinə götürür. Kapitan komandanın lideri, meydanda məşqçi əvəzidi. Lider kapitan sarğısını qolunda daşıyan demək deyil. Lider odu ki, oyunu və xarakteri ilə komandasına kömək etsin. Millidə buna ehtiyac var. Bəli, hazırkı yığmada lider çatışmır. Çünki bütün futbolçular, demək olar ki, eyni səviyyədə çıxış edir. Heç kim fərqli oyun göstərmir. Həm təcrübəli, həm də xarakter göstərib komanda yoldaşlarına nümunə olan futbolçu liderdi. Millinin bu heyətində lider ola biləcək futbolçunu demək çətindi”.
MÜZƏFFƏR QULUZADƏ
