Millətlər Liqasının 3-cü turunda keçirilən Estoniya - Azərbaycan matçının (3:1) 76-cı dəqiqəsindən bəri Emin Mahmudovun sosial şəbəkə hesablarını diqqətdə saxlayıram.

Ona görə ki, millimizin və "Neftçi"nin üzvü məhz həmin dəqiqədə meydana çıxdı və Abbas Hüseynov kapitan sarğısını ona vermədi. Elə həmin anda dodaqlarımdan bu ifadə qopdu: "ey dadi-bidad, Eminin milli karyerası da təhlükədədi! Roman Qriqorçukun addımını Fernando Santuş da təkrarladı!"

...beləcə "Neftçi"də kapitan sarğısını itirən futbolçu sosial şəbəkə hesabında bu haqda açıqlama yaydığını xatırladım və həmin sözləri indi də milli üçün istifadə edəcəyini gözləməyə başladım...

Eminin adı Qriqoçukun kapitanlar siyahısında yox idi. Santuş isə hələ üçüncü kapitanın adını açıqlamayıb. Bədavi Hüseynov, Abbas Hüseynov, bəs sonra? Bu hələ bilinmir. Bəlli olan odu ki, Mahmudov məlum penalti epizodunda topu Ramil Şeydayevə təhvil verdiyinə görə ağır cəza alıb. Böyük ehtimalla, onu millidə bir daha kapitan sarğısıyla görməyəcəyik. Ona görə ki, Santuş təbii olaraq, futbolçuların klublarındakı məharətinə uyğun davranır. İndiyə qədər onlardan yalnız "Qarabağ"ın adını çəkməsi, kapitanların məhz Ağdam təmsilçisinin heyətindən seçilməsi də təsadüfi deyil. "Köhlən atlar" liderdisə, ən təcrübəli yerli futbolçusu Bədavidisə, sarğı da onundu. Eminin sarğıya yenidən qovuşması üçün yalnız özünün lider olması yox, komandasının da mövqeyini yaxşılaşdırması vacibdi.

Santuş ölkəmizin ən güclü komandalarının ən güclü futbolçularıyla nəticə qazanmağa çalışacaq. Ki, uğursuz olacağı təqdirdə onu heç kim günahlandıra bilməsin.
İndi Eminə nə "Neftçi"də yer var, nə də millidə. Onun üçün mütləq möcüzə lazımdı.

KƏNAN BAHADIR