"Yığma Belçika ilə oyunda yaxşı çıxış etdi. Deyərdim ki, milli son 6 oyunla müqayisədə döyüşkən matç keçirdi. Uşaqlar çox istəkliydi. Demək olar ki, hər mövqedə futbolçularımız maksimum güc sərf etdi. Sürət, texnika artıb. Amma bu o demək deyil ki, düz yoldayıq. Belçikaya qarşı mübariz oyun hər şeyin qaydasında olması demək deyil. Çünki, cəmi 1 xal toplaya bilmişik. Amma bir vaxtlar rahatlıqla məğlub etdiyimiz yığmalar öz qrupunda 8-12 arası xal yığıb. Könül istərdi ki, millimizin bütün qarşılaşmalarında Belçikaya qarşı sərgilədiyi oyunu görək, amma xal və xallar da qazanaq. Heyətdə, həqiqətən də, lider funksiyalarını daşıyacaq futbolçu yoxdu. 10-12 il əvvəlki millimizdə belə oyunçular çox idi. Kapitan sarğısının Rəşad Sadıqovda olmasına rəğmən, qalan 10 oyunçu və ehtiyat oyunçular skamyasında əyləşənlər də lider idi. Kamran Ağayev, Rail Məlikov, Samir Abasov, Mahir Şükürov, Ruslan Abuşovu, həmçinin özümü də qeyd edərdim. Hər birimiz Rəşad Sadıqovu layiqincə əvəz və meydanda futbolçuları idarə edə bilirdik. Bizim vaxtımızda millidə ab-hava, atmosfer tam başqa idi. Həmçinin uzun illər öncə biz Belçikanı 25-30 min azarkeş önündə büdrətmişdik. Amma indi ulduzlardan qurulan Belçika ilə oyun üçün "Dalğa Arena"da 4 min azarkeşi güclə toplayırıq. Mənə çatmır ki, “Tofiq Bəhramov”, Olimpiya Stadionu ola-ola, niyə yığmanın oyunları Mərdəkanda keçirilməlidi?! Bizim vaxtımızdakı yığmanın dayaqlarından biri də azarkeşlər idi. Amma hazırkı milliyə azarkeş dəstəyi görünmür. Bunun səbəblərindən biri, yuxarıda qeyd etdiyim kimi, futbol məkanının düzgün seçilməməsidi. Düşünürəm ki, Belçika ilə oyun "Dalğa Arena"da keçirilməməliydi. Gələcəkdə AFFA rəhbərliyi bunu nəzərə alsa, yaxşı olar. Millinin oyunlarına azarkeşləri yenidən cəlb etmək yönündə iş aparılmalıdı".

Oyun planında inkişafımız hiss olundu. Futbolçular baş məşqçinin tapşırıqlarını maksimum yerinə yetirməyə çalışdı. FİFA reytinqinin ilk sıralarında yer alan Belçika kimi güclü rəqibdən millimiz çəkinmədi, döyüşdü, hətta yüzfaizlik qol imkanlarımız da oldu. Futbolçularımız xal götürmək üçün çox istəkli idi. Sadəcə, həmin gün bir qədər bəxt amili də bizdən uzaq düşdü. Deyərdim ki, hər mövqedə inkişaf görünürdü. Qapıda Şahruddin yaxşı seyvlərlə diqqəti çəkdi. Yaxşı təsir bağışladı. Qol buraxsaq da, qapıçının səhvindən olmadı. Müdafiə ilə hücum xəttinin daha yaxşı təsir bağışladığını deyərdim. Dayaq yarımmüdafiəçisi mövqeyində oyunçularımız nə qədər çalışsalar da, yaxşı çıxış edə bilmədilər. Forvardlarımız qol vura bilməsə də, cəhdlər etdilər. Etiraf edək ki, rəqib qapıçı da yaxşı oynadı. Liderliyə gəlincə, Emin Mahmudov futbolçu kimi yaxşıdı. Amma o komandanı arxasınca apara bilmir. Hər komandada lider funksiyasını daşıyacaq oyunçular olmalıdı. Bəlkə də gələcəkdə Emin işinin öhdəsindən daha yaxşı gələcək. Amma hazırda arzuolunan səviyyədə deyil. Həmçinin başqa oyunçular da matçboyu kapitana hər cür kömək göstərməli, onun göstərişlərini yerinə yetirməlidi".