“Haiti ilə oyunda aldığımız 0:3 hesablı məğlubiyyət ağır idi, bəli. Amma kimsə elə düşünürsə ki, bu məğlubiyyət bizi stadionlardan, komandadan uzaqlaşdıracaq, çox yanılır. Biz azarkeşik, nəticəyə görə sevənlərdən deyilik. Biz bu formanı, bu bayrağı sevənlərik. Dünən komandanın məşqinə getdik, bütün heyətlə üz-üzə danışdıq. Açıq şəkildə fikirlərimizi və etirazımızı ifadə etdik. Biz gedəsi deyilik, kim formanın haqqını vermirsə, onlar gedə bilərlər. Biz tribunada son nəfərə qədər qalacağıq. Bu komandanın əlindən tutub ya qaldıracağıq, ya da qaldıracağıq. Stadiona azarkeş gəlməyəcək deyənlərə deyirik: stadionlara dəstək üçün yox, nəticə üçün gəlirdizsə, buyurun, gəlməyin. Biz isə gələcəyik. Biz döyüş tələb edirik! Qələbə tələb edirik! Azərbaycan formasını geyən hər kəs son saniyəyə qədər vuruşmalıdı və bu millətə borcudu. Haiti məğlubiyyəti bizi sındırmadı, daha da motivasiya verdi. Belarus qarşısında meydanda mübarizə görməsək, onda hamı məsuliyyət daşıyacaq. Amma biz orada olacağıq. Çünki bu torpaq, bu bayraq, bu millət geri çəkilənləri sevmir!”