"Kimyaçılar" və "UltraSumqayıt" fanklubları yığmanı dəstəkləyəcəkmi? - özləri açıqladı
Yığmamız bu gün beynəlxalq yoldaşlıq oyunu çərçivəsində Haiti ilə qarşılaşacaq. Sumqayıtda - Mehdi Hüseynzadə adına şəhər stadionunda keçiriləcək matç saat 21.45-də başlayacaq.
Xatırladaq ki, millimiz tarixində ilk dəfə Sumqayıtda meydana çıxacaq. Əlbəttə, belədə sumqayıtlı azarkeşlərin ölkənin əsas komandasını dəstəkləmək üçün stadiona yollanması gözlənilir. Bəs, şəhərin, dəqiq desək, "Sumqayıt"ın fanklubları tribunalarda yer alacaqmı?
"Football-plus.az" bu suallarla "Sumqayıt"ın azarkeş qruplarının rəhbərlərinə müraciət etdi.
Sənan Mirzəyev ("Kimyaçılar"):
"Bəli, bu barədə AFFA-ya təklifimizi vermişik. Qarşı tərəf təşəbbüsü bəyənib. İndi hazırlıqlar davam edir. Stadiona yollanıb millimizi dəstəkləməklə Azərbaycanın yaşıl meydanlarda tək olmadığını göstərəcəyik. Xüsusi pankartlar hazırlamaq fikrimiz yoxdu. Amma azı 400 nəfər olacağıq və 90 dəqiqə ərzində yığmamızı dəstəksiz qoymayacağıq. Zənglər dayanmır. Ona görə ki, məhz millinin matçı olduğuna görə fanklubun üzvü olmayan çoxsaylı futbolsevərlər bizə müraciət edir və komandamızı "Kimyaçılar"ın tərkibində dəstəkləmək istədiklərini deyir".
Qüdrət Allahverdiyev ("UltraSumqayıt"):
"Təbii ki, biz də millimizi tək qoymaq niyyətində deyilik. Təklifimizə AFFA tərəfindən müsbət cavab verilib. "Göyqurdlar" fanklubuyla üzbəüz tribunalarda yerimizi alacağıq. Xüsusi pankart açmaq fikrində deyilik. UEFA bu məsələlərdə sərt qaydalar qoyub. Millimizə şüarlarla dəstək verəcəyik. Azı 100-150 nəfər olacağıq. Əlbəttə, say arta bilər. Çünki fanklubumuzun üzvü olmayan, amma millimizi bizimlə birlikdə dəstəkləmək istəyən xeyli futbolsevər var. Yığmamıza uğurlar arzulayırıq".
KƏNAN BAHADIR
Digər xəbərlər
