“Srağagün Gürcüstanda baş verən bədbəxt hadisə nəticəsində dayım oğlu Nəbi 22 yaşında avtomobil qəzası keçirərək vəfat etdi. Nəbi eyni zamanda, “Göyqurdlar”ın əlaqələndiricisi idi. Oyunlarda mənə çox dəstək olub kömək edənlərdən idi. Evimizdən bütün plakatların, bayraq çubuqlarının, barabanın daşınmasında - həm stadiona aparılmasında, həm də oyundan sonra geri gətirilməsində - böyük rolu var idi. Bu yarıtmaz millinin oyunlarına göndərib iş tapşıranda heç vaxt “yox” deməzdi. Atası ilə birlikdə bizim 11-ci sektorun dəmir tribunası üçün Tofiq Bəhramov stadionunun həyətində gecəyə qədər qaynaq işləri də aparmışdıq. Bu, sadəcə, bir dəmir parçası deyildi. İçində əziyyət, sevgi və fədakarlıq olan bir hissə idi. Haiti ilə matçın başlamasına dəqiqələr qalmış bu ağır xəbəri aldıqdan sonra hamımız dərin kədər yaşadıq. Xanım üzvlərimiz tribunda bu xəbəri eşidəndə göz yaşlarını saxlaya bilmədilər. Bütün üzvlərimiz xəbəri eşitdikdən sonra çökdülər. Azarkeş qrupunun rəhbəri olaraq, məsuliyyəti üzərimə götürüb fasilədən sonra tribunanı tərk etmək qərarı verdim. Eyni zamanda, dünən yas səbəbi ilə Belarus matçında iştirak etməyəcəyimizi AFFA-ya bildirmişdik. Lakin dünən gecə Şimali Amerika qitəsinin kiçik ada ölkəsinə qarşı yaşadığımız rüsvayçı 0:3 hesablı məğlubiyyətdən sonra bu qərarımızı dəyişməli olduq. Bu, bizim üçün çox çətin olsa da, tribunamızı sahibsiz buraxmamaq qərarına gəldik. Hər dəfə millinin oyunu üçün şəxsi vəsaitim hesabına Polşadan Bakıya uçuram. “Sector 11”dən sonra illərlə boş qalan tribunamızı yenidən canlandırmaq üçün birlikdə çalışırıq. Çünki millinin oyunlarında boş tribunalar görmək ürəyimizi parçalayır. Bilməyənlər üçün təkrar qeyd edək ki, federasiyadan 1 qəpik belə pul almırıq. Məni tanıyanlar onsuz da bunu bilir, bilməyənlər üçün təkrar qeyd edim. Futbolçularımızın hər matç ərəfəsində Bakıda qaldığı lüks otellərdə Azərbaycan vətəndaşlarının böyük əksəriyyəti ömrü boyunca bir gecə belə qala bilmir. Onlar yüksək səviyyəli məşqlərlə oyuna hazırlanır, səfərlərə çarter reysləri ilə gedirlər. Amma bu qədər imkanlara rəğmən, nəticə yoxdu. Həmin bu pulda hər bir azərbaycanlının alın təri var. Heç kim düşünməsin ki, tribuna sahibsizdi. Bu tribunalar boş qaldıqca onlar daha da rahat olacaqlar. Vecsiz çıxış edib, sadəcə, evlərinə qayıdacaqlar. Amma bilməlidirlər ki, geyindikləri formanı, daşıdıqları bayrağı və təmsil etdikləri ölkəni layiqincə təmsil etməyincə, biz yerimizi tərk etməyəcəyik! Yasımız olmasına rəğmən, martın 25-də yerimizdə olacağıq. Gedən biz yox, o formanın haqqını verməyənlər olacaq”.