Tuxel tarixə düşən oyunçusuna tərif yağdırdı
Tomas Tuxelin İngiltərə yığmasındakı debütü uğurlu alındı.
''Football-plus.az'' xəbər verir ki, ingilislər təcrübəli almaniyalı mütəxəssisin başçılığı altında ilk oyunda DÇ-2026-nın seçmə mərhələsində Albaniyanı ''Uembli''də 2 cavabsız qolla məğlub etdilər. Özü də qələbənin əsasını ''Arsenal''ın gənc sol müdafiəçisi Maylz Lüis-Skelli qoydu.
Bu futbolçu həm də adını İngiltərə yığmasının tarixinə yazdırıldı. O, 18 yaş 176 günlüyündə fərqlənməklə İngiltərənin heyətində debüt oyununda qol vuran ən gənc futbolçuya çevrildi. Əvvəlki rekord Markus Reşforda məxsus idi.
Hazırda ''Aston Villa''da çıxış edən Reşford 2016-cı ildə Avstraliya ilə oyunda 18 yaş 209 günlüyündə debüt etmiş və qol vurmuşdu. Tuxel oyundan sonra həm komandasının, həm də ulduzu parlayan Lüis-Skellinin performansını dəyərləndirərək bunları deyib:
''Düzdü, qalib gəldik. Amma bu, bizim maksimum oyunumuz deyil. Bundan daha yaxşı oynamağa qadirik. Bəzi anlarda topa çox yaxşı nəzarət edirdik və yüksək enerji ilə oynayırdıq. İlk 7-8 dəqiqədə rəqibə ümumiyyətlə topu vermədik. İkinci hissədə tempimiz aşağı düşdü. Ötürmələrin sürəti yetərli deyildi. Albaniya bütün komanda ilə yaxşı müdafiə olunmağı bacaran komandadı. Bunu son Avropa Çempionatında da göstərdilər. Lüis-Skelli isə inanılmaz oyunçudu. Əla xarakterə malikdi. Yığmanın düşərgəsinə ilk dəfə gəlsə də, çox tez hamının simpatiyasını qazanmağı bacardı. Bu sevinci yaşamağa və tarixə düşməyə layiq idi''.
Digər xəbərlər
